නදීශා ගයන්තිට එංගලන්තයේ දී රන් සහ රිදී පදක්කම් දෙකක්

එංගලන්තයේ පැවති 108 වැනි සමස්ථ එංගලන්ත ජ්‍යෙෂ්ඨ බැඩ්මින්ටන් ශූරතා තරගාවලියට ( All England Senior Badminton Championship ), ශ්‍රී ලංකාව නියෝජනය කරමින් සහභාගී වූ නදීශා ගයන්ති, රන් පදක්කමක් සහ රිදී පදක්කමක් දිනා ගෙන අද (15) දින උදෑසන කටුනායක ගුවන් තොටුපොළ වෙත පැමිණියා.

මෙම තරගාවලිය ලෝකයේ රටවල් 25ක බැඩ්මින්ටන් ක්‍රීඩක ක්‍රීඩිකාවන් 400ක ගේ සහභාගීත්වයෙන් , ඉකුත් 10 වන දින සිට 12 දින දක්වා එංගලන්තයේ ලන්ඩන් නුවර පවත්වා තිබුණා.

එහිදී නදීශා ගයන්ති වයස අවුරුදු 40ට වැඩි කේවළ ඉසව්වෙන් රන් පදක්කම සහ මිශ්‍ර යුගළ ඉසව්වෙන් රිදී පදක්කම දිනා ගැනීමට සමත් වී සිටියා.

මෙම ජයග්‍රහණයන් රැගත් නදීශා ගයන්ති අද (15) දින උදෑසන 08.20ට ඩුබායි සිට එමිරේට්ස් ගුවන් සේවයේ ඊ.කේ.- 650 දරන ගුවන් යානයෙන් කටුනායක ගුවන් තොටුපොළ වෙත පැමිණ සිටියා.