මඩුල්ල – මීගහපිටිය කෝට්ටගල හරහා ලියන්ගොල්ල හන්දිය දක්වා දිවෙන ප්‍රධාන මාර්ගයක් වන අල්පිටිය – කෝට්ටගල ග්‍රාම නිලධාරි වසම් මායිමේ ඇති පැරණි පාලමක් කඩා වැටී අනතුරක් සිදු ව තිබෙනවා.
මෙම පාලම මතින් දැව පටවාගත් ලොරි රථයක් ගමන් කිරීමේදීයි එම පාලම ලොරි රථය සමග ම කඩා වැටී ඇත්තේ.
ගම්මාන කිහිපයක ගම්වැසියන් මෙම මාර්ගය පාලම උපයෝගී කරගනිමින් භාවිතා කරන අතර, මෙම මාර්ගයේ එක් බස් රථයක් ද ධාවනය වනවා.
නමුත් පාලම කඩා වැටීම හේතුවෙන් බස් රථය ධාවනය වීම ද නැවතී ඇති බැවින්, ඒ හේතුවෙන් එම ප්‍රදේශයේ දරුවන් සහ වෘත්තිකයින් හට පාසල් සහ රාජකාරී කටයුතු සඳහා යෑමේ නොහැකියාවක් උද්ගත ව ඇති බවයි අප ප්‍රාදේශීය වාර්තාකරු පැවසුවේ.
මෙම අනතුරින් ලොරි රථයේ රියදුරු ජීවිතය බේරාගැනීමට සමත් ව තිබෙනවා.
අනතුර සම්බන්ධයෙන් දඹගල්ල පොලිස් ස්ථානයේ නිලධාරීන් පරීක්ෂණයක් සිදු කරනවා.
