යමෙකු අත්අඩංගුවට ගැනීමට පෙර අපේක්ෂිත ඇපයක් මත මුදාහැරිමට අධිකාරි බලයක් මහේස්ත්රාත් අධිකරණය සතුව ඇති නමුත් එම බලය භාවිත කළ යුත්තේ රටේ අධිකරණයට හා නීතියට ගරු කර පුරවැසියන් වෙනුවෙන් මිසක දින සති ගනන් වහන් වී නීතිය සමච්චලයට ලක් කළ පුද්ගලයකු වෙනුවෙන් නොව බව රජයේ අධිනීතිඥ ඔස්වල්ඩ් ලක්ෂ්මන් පෙරේරා කොටුව මහේස්ත්රාත් නිලුපුලි ලංකාපුර මෙනවිය හමුවේ පැවසුවා.
තමන් අත්අඩංගුවට නොගන්නා ලෙස ඉල්ලමින්, හිටපු පොලිස්පති දේශබන්දු තෙන්නකෝන් වෙනුවෙන් නීතිඥ අජිත් පතිරණ කළ අපේක්ෂිත ඇප ඉල්ලීම පිළිබඳ නියෝගය ලබන අගෝස්තු 07 වනදා ලිඛිත විරෝධතා ගොනු කිරිමෙන් අනතුරුව නිකුත් කරන බව කොටුව මහේස්ත්රාත් නිලුපුලී ලංකාපුර මෙනවිය සියලු පාර්ශ්වවලට දැනුම් දුන්නා.
අපේක්ෂිත ඇප ඉල්ලීම සම්බන්ධයෙන් ලිඛිත විරෝධතා ඇත්නම් එදිනට ගොනුකරන ලෙසත් ඉන් අනතුරුව සුදුසු නියෝගයක් නිකුත් කරන බවද මහේස්ත්රාත්වරිය සඳහන් කළා.
අරගලය පැවැති අවස්ථාවේ දී ජනාධිපති ලේකම් කාර්යාලයට අදාළ නඩුවක් ගොනු කර ඇති බැවින් එම සිද්ධිය සම්බන්ධයෙන් තමන් අඩංගුවට ගැනීමේ සූදානමක් ඇති බව පවසමින් හිටපු පොලිස්පතිවරයා අපේක්ෂිත ඇප ඉල්ලුමක් අද (05) ඉදිරිපත් කළ අවස්ථාවේ මහේස්ත්රාත්වරිය මෙම නියෝගය දැනුම් දුන්නා.
