අවිස්සාවේල්ල – කොළඹ හයිලෙවල් මාර්ගයේ පාදුක්ක – මාවතගම, කොඩිගහකන්ද මාවත අසල දී යතුරු පැදි දෙකක් එකිනෙක ගැටීමෙන් සිදු වූ අනතුරකින් එක් යතුරු පැදියක පසුපැදිකරු ලෙස සිටි කාන්තාවක් එම ස්ථානයේදී ම මියගොස් ඇතැයි පාදුක්ක පොලිසිය පවසනවා.
දසත ප්රාදේශීය වාර්තාකරු පැවසුවේ; අනතුරට ලක් වූ යතුරුපැදි දෙකම පහත්ගම දෙස සිට මීපේ දෙසට ධාවනය කර ඇති අතර මියගිය කාන්තාව තම ස්වාමිපුරුෂයා සමග ගමන්ගත් යතුරුපැදිය වම් අත දෙසින් ධාවනය කරමින් සිට එක්වරම මාර්ගය හරහා දකුණු පැත්තට ධාවනය කරවීමේ දී එම දෙසටම ධාවනය වූ තවත් යතුරුපැදියක ගැටීමෙන් මෙම අනතුර සිදු ව ඇති බවයි.
මෙලෙස මියගොස් ඇත්තේ ඉහළ හංවැල්ල ප්රදේශයේ පදිංචිකාරියක වන බමුණුආරච්චිගේ කුමාරි සාගරිකා නමැති 48 හැවිරිදි දෙදරු මවක්.
අනතුරින් තුවාල ලැබූ මියගිය කාන්තාවගේ ස්වාමිපුරුෂයා සහ අනෙක් යතුරුපැදියෙහි පැදිකරු සුළු තුවාල ලබා පාදුක්ක දිසා රෝහලට ඇතුළත් කර ඇති අතර මියගිය කාන්තාවගේ දේහය එම රෝහලේ ම මෘත ශරීරාගාරයේ තැන්පත් කර තිබෙනවා.
පාදුක්ක පොලිසිය වැඩිදුරටත් පරීක්ෂණ පවත්වනු ඇති.
