නිවසකට බලහත්කාරයෙන් ඇතුළු වී නිවසේ හිමිකරු බිය ගන්වා දෑත් බැඳ රුපියල් 120,000ක් වටිනා රන් ආභරණ, මුදල් ඇතුළු දේපළ පැහැරගෙන ඔහුගේ බිරිඳව දූෂණය කළේ යැයි කියන පුද්ගලයෙකුට කොළඹ මහාධිකරණ විනිසුරු ආදිත්ය පටබැඳිගේ මහතා අද (08) බරපතළ වැඩ සහිත වසර 18ක සිරදඬුවම් නියම කළා.
ලක්ෂිත සුලක්ෂණ සුන්දර ලිංගම් යන තිස් තුන් හැවිරිදි අවිවාහක තරුණකුට මෙලෙස මහාධිකරණය මඟින් දඬුවම් නියම කරනු ලැබුවා .
එමෙන්ම දූෂණයට ලක් වූ කාන්තාවට රුපියල් එක් ලක්ෂ පනස්දහසක වන්දි මුදලක් ගෙවන ලෙස ද නියෝග කළ විනිසුරුවරයා රුපියල් විසිහය දහසක දඩ මුදලක් ද ගෙවීමට විත්තිකරුට නියෝග කළා.
එම දඩය හා වන්දි මුදල් නොගවන්නේ නම් විත්තිකරුට අමතර ලිහිල් සිර දඬුවම් නියම කළ විනිසුරුවරයා නඩුවේ දෙවන විත්තිකරු ලෙස නම් කර සිටි කසුන් සුදර්ශන යන අය සියලු චෝදනාවකින් නිදොස් කොට නිදහස් කිරීමට නියම කර සිටියා.
පැවති දීර්ඝ නඩු විභාගයකින් අනතුරුව පැමිණිල්ල විසින් ඉදිරිපත් කර ඇති චෝදනා සාධාරණ සැකයකින් ඔබ්බට ඉදිරිපත් කර ඇති බැවින්, විත්තිකරු සියලු චෝදනාවන්ට වරදකරු කරන බවට ප්රකාශ කළ විනිසුරුවරයා විත්තියේ නීතිඥ අසිත විපුලනායක විසින් විත්තිකරු වෙනුවෙන් ඉදිරිපත් කරන ලද කරුණු දැක්වීම් සලකා බැලීමෙන් අනතුරුව මෙලෙස අවම දඬුවම් නියම කිරීමටයි කටයුතු කළේ .
මෙම විත්තිකරු මීට පෙර ද වෙනත් චෝදනාවකට අධිකරණය මඟින් වරදකරු වී දඬුවම් ලැබූ අයකු බවට අධිකරණයේ හමුවේ අනාවරණය වී ඇති අතර, මොහු සිදුකරන ලද වරදේ බරපතළකම පිළිබඳ සලකා බලා උපරිම දඬුවම් විත්තිකරුට නියම කරන ලෙසට රජයේ අධිනීතීඥවරිය අධිකරණයෙන් ඉල්ලා සිටියා.
2017 අගෝස්තු මස 08 වන දින වැල්ලම්පිටිය ප්රදේශයේ නිවසකට තවත් පුද්ගලයකු සමඟ ඇතුල් වී සිදුකර ඇති එම අපරාධය සම්බන්ධයෙන් නීතිපතිවරයා විසින් විත්තිකරුවන් දෙදෙනෙකුට එරෙහිව මෙම නඩුව කොළඹ මහාධිකරණය හමුවේ ගොනු කර තිබුණා.
