දුර්ලභ බන්දුල පෙතියා මත්ස්‍යයාගේ වාසස්ථානයක් වන නික්කඳුපොල ඇළ මාර්ගයේ කොටසක් අභය භූමියක් ලෙස ප්‍රකාශයට පත් කිරීමට කැබිනට් මණ්ඩලයේ අනුමැතිය හිමි ව තිබෙනවා.
මෙම සීමිත මසුන් සංඛ්‍යාව ආරක්ෂා කිරීම සඳහා වරකාපොල ප්‍රාදේශීය ලේකම් කොට්ඨාසයේ, ගලපිටමඩ ප්‍රදේශයේ, රබ්බිඩිගල සිට හපුගොඩ දක්වා ගලා බසින දොළ පහරේ හඳුනාගන්නා ලද කිලෝමීටර් 2.5ක පමණ ප්‍රදේශය දොළ පහරේ මධ්‍ය රේඛාවේ සිට දෙපසටම මීටර් පහළොව බැගින් වන භූමි ප්‍රමාණය ”නික්කඳුපොල අභය භූමිය ”ලෙස ප්‍රකාශයට පත් කිරීම පිණිස පරිසර අමාත්‍ය වෛද්‍ය ධම්මික පටබැඳි ඉදිරිපත් කළ යෝජනාවටයි, මෙලෙස අමාත්‍ය මණ්ඩල අනුමැතිය හිමි වූයේ.
1991 වර්ෂයේදී හඳුනාගනු ලැබ ඇති බන්දුල පෙතියා මෙරටට ආවේණික, දුර්ලභ හා දැඩි ලෙස වඳ වී යාමේ තර්ජනයට මුහුණ පා ඇති මත්ස්‍ය විශේෂයක්.
දැනට සිදු කර ඇති ගණනය කිරීම්වලට අනුව, මෙම මසුන් සංඛ්‍යාත්මකව 300ක් හෝ ඊට අඩු ප්‍රමාණයක් ජීවත් වෙතැයි සැලකෙනවා.
රසායනික පොහොර හා කෘෂි රසායන යොදා ගන්නා කුඹුරු වගාවන් පවතින බැවින්, මානව ක්‍රියාකාරකම් බහුලව සිදු වන දොළ පහරක ජීවත් වීම, රතු දත්ත ලේඛනයට ඇතුළත්ව ඇති මෙම මත්ස්‍යයාගේ ඉදිරි පැවැත්මට බලවත් තර්ජනයක් බව නිරීක්ෂණය වී ඇති හෙයින් මේ සම්බන්ධයෙන් රජයේ අවධානය යොමු වීමේ ප්‍රතිඵලයක් ලෙසයි මෙම තීරණය ගැනුණේ.
ලෝකෙටම මෙපමණයි,වැදගත් දෙයට වැදගත්කමක් දෙන්න ඔනී,යහපත් යෝජනාවක්.