දික්ඔය දිවිත්ව ඝාතනයේ සැකකරු රෝහලෙන් පැන ගිහින්

හැටන් – දික්ඔය දිවිත්ව ඝාතනයේ සැකකරු රෝහල් ගතව ප්‍රතිකාර ලබමින් සිටිය දී බන්ධනාගාර නිලධාරීන්ගේ මිදී පළාගොස් තිබෙනවා.

සැකකරු අද (27) අලුයම මෙලෙස රෝහලෙන් පළාගොස් ඇති බවයි වාර්තා වුණේ.

මෙම සැකකරු ලබන 03 වනදා දක්වා රක්ෂිත බන්ධනාගාර ගතව සිටියදී ඔහුට ඇතිවූ හදිසි රෝගී තත්ත්වයක් මත බන්ධනාගාර නිලධාරින් විසින් ඊයේ (26) මහනුවර ශික්ෂණ රෝහල වෙත ඇතුළත්කර තිබෙනවා.

එහිදී නේවාසිකව ප්‍රතිකාර ලබමින් සිටි මෙම සැකකරු අද (27) අලුයම රොහලේ පැන ගොස් ඇති අතර, සැකකරු අත්අඩංගුවට ගැනීමට බන්ධනාගාර නිලධාරින් සහ පොලිස් නිලධාරීන් මෙහෙයුමක් දියත් කර ඇති බවයි වාර්තා වුණේ.

හැටන් – දික්ඔය නගරයේ වෙළඳසැලක සිටි මහලු අඹුසැමි යුවලක් ඝාතනය කර ඔවුන් සතුව තිබූ රත්‍රං කොල්ල කා පලාගොස් සිටි මෙම සැකකරු බගවන්තලාව පෙට්‍රසෝ වතුයායේ සැඟව සිටියදී පොලිසිය විසින් අත්අඩංගුවට ගෙන තිබෙනවා.

අත්අඩංගුවට ගැනුණු සැකකරු හැටන් මහේස්ත්‍රාත් අධිකරණය වෙත ඉදිරිපත් කිරිමෙන් පසු ලබන 03 වනදා දක්වා රක්ෂිත බන්ධනාගාර ගතකර තිබුණා.

සැකකරු බිරිදගේ ණය මුදලක් ගෙවීම සදහා බිරිදගේ බලපෑම මත තමන් මෙම ඝාතනය සහ සොරකම සිදුකළ බවත්, තමන් එම තත්ත්වයට පෙළඹ වූ බිරිදව බන්ධනාගාරයෙන් නිදහස්ව පැමිණ ඝාතනය කරන බවට ඔහු පොලිසිය වෙත පවසා තිබෙනවා.

සැකකරු සහ ඔහු විසින් සොරකම් කරන ලද ස්වර්ණාභරණ දැඩි පරිශ්‍රමයක් දරා සොයා ගත් පොලිස් නිලධාරින් එම සතුට සැමරීම වෙනුවෙන් කේක් කපා තිබුණා.