දරුවන් තිදෙනාට වස දී පියාත් අරක්කු සමඟ වස පානය කරලා

පියෙකු විසින් සිය දරු තිදෙනාට වස පොවා ඔහු ද වස පානය කළ පුවතක් ගම්පොළ, දැල්පිටිය, සෙවනක් ජනපදය ප්‍රදේශයෙන් වාර්තා වනවා.

වස පානය කිරීමෙන් පසු බරපතළ තත්ත්වයේ පසු වූ ඔවුන් සිව්දෙනා ප්‍රතිකාර සඳහා ගම්පොළ ශික්ෂණ රෝහල වෙත ඇතුළත් කර ඇති බව සඳහන්.

මෙලෙස රෝහල් ගතකර ඇත්තේ වයස අවුරුදු 04ක් වූ පිරිමි දරුවෙක්, අවුරුදු 13ක, අවුරුදු 07ක ගැහැණු දරුවන් දෙදෙනෙකු සහ 40 හැවිරිදි ඔවුන්ගේ පියා බවයි වාර්තා වුණේ.

මෙම පවුලේ සැමියා සහ බිරිඳ අතර දීර්ඝ කාලයක සිට ආරවුලක් තිබී ඇති බවට අනාවරණය වී ඇති අතර, ඒ හේතුවෙන් බිරිඳ නිවසින් පිටව ගොස් ඇති බවයි අනාවරණය වී ඇත්තේ.

ඒ හේතුවෙන් පියා සහ දරුවන් තිදෙනා තනිව නිවසේ ජීවත්ව ඇති බවයි ගම්පොල පොලිසිය සඳහන් කළේ.

ඊයේ (07) රාත්‍රී 10.00 ට පමණ නිවසට පැමිණ ඇති පියා දරුවන්ට නොදැනෙන සේ පැණිබීම බෝතලයකට වස දමා දරුවන් තිදෙනාට එය බීමට සලස්වා ඇති බවටයි හෙළිව ඇත්තේ.

පසුව ඔහු ද නිවසේ කාමරයක ගොස් අරක්කු සමඟ වස පානය කර ඇති බවට හෙළිව තිබෙනවා.

අනතුරුව රාත්‍රී කාලයේ දී පියා, බාල සහෝදරිය සහ සහෝදරයා වමනය කිරීමට පටන් ගැනීමත් සමඟ 13 හැවිරිදි වැඩිමහල් දියණිය ඔවුන්ගේ නිවස අසළ පදිංචිව සිටි ඥාතියෙකුට මේ පිළිබඳව දැනුම් දීමටයි කටයුතු කර ඇත්තේ.

පසුව ඔවුන් සියලු දෙනා ගම්පොල රෝහලට ඇතුළත් කර තිබෙනවා.

වස පානය කිරීමට පෙර සැමියා විසින් සිය බිරිඳගේ සහ දරුවන්ගේ ඡායාරූප ඇඳ මත තබාගෙන බලමින් සිට ඇති බව ද පරීක්ෂණවලදී අනාවරණය වී තිබෙනවා.