පාර්ලිමේන්තු මන්ත්‍රී දයාසිරි ජයසේකරගේ ක්‍රියාකලාපය සම්බන්ධයෙන් ලද පැමිණිල්ලක් විමර්ශනය කර වාර්තා කිරීමට පත්කළ ත්‍රිපුද්ගල කමිටුවෙන් විපක්ෂයේ ප්‍රධාන සංවිධායක ගයන්ත කරුණාතිලක මන්ත්‍රීවරයා ඉවත් වී තිබෙනවා.
පාර්ලිමේන්තු කටයුතු අද (06) දිනට ආරම්භ කරමින් කතානායක ජගත් වික්‍රමරත්න මේ බව පාර්ලිමේන්තුවට දැනුම් දුන්නා.
ගයන්ත කරුණාතිලක මන්ත්‍රීවරයා ඉවත්වීමෙන් පසු එම කමිටුව වෙනුවෙන් රවුෆ් හකීම් මන්ත්‍රීවරයා පත්කළ බවයි කතානායකවරයා වැඩිදුරටත් දැනුම් දුන්නේ.
පසුගිය මැයි 20 වනදා පාර්ලිමේන්තු සභා ගර්භය තුළදී දයාසිරි ජයසේකර මන්ත්‍රීවරයාගේ ක්‍රියාකලාපය සම්බන්ධව ලද පැමිණිල්ලක් සැළකිල්ලට ගනිමින් මෙම කමිටුව පත්කර තිබෙනවා.
මෙම කමිටුවේ සභාපති ලෙස නියෝජ්‍ය කාරක සභා සභාපතිනි හේමාලි වීරසේකර කටයුතු කරන අතර, විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මෙම කමිටුවේ අනෙක් සාමාජිකයායි.
