තැපැල් ඡන්දය සලකුණු කිරීමට දුන් අතිරේක දින ඇරඹෙයි – අද පළමු දිනයයි

2024 ජනාධිපතිවරණයේ තැපැල් ඡන්දය භාවිත කිරීමට නොහැකි වූ ඡන්ද දායකයින් හට අද (11) සහ හෙට (12) දිනය ඒ සඳහා විවෘත ව පවතිනවා.

මැතිවරණ කොමිෂන් සභාව පැවසුවේ; පසුගියදා දින තුනක් පුරාවට ම පැවති තැපැල් ඡන්ද සලකුණු කිරීමේ කටයුතුවලට අත්‍යවශ්‍ය හෝ නොවැළැක්විය හැකි හේතුවක් මත එක් වීමට නොහැකි ඡන්ද දායකයින් සඳහා අද සහ හෙට යන දෙදින වෙන් කර ඇති බවයි.

මෙය මෙවර ජනාධිපතිවරණය ඉලක්ක කරගෙන මැතිවරණ කොමිෂන් සභාවෙන් තැපැල් ඡන්දය සඳහා ලබාදුන් අතිරේක කාලයක් ද වනවා.

ජූලි මස 28 වැනි දින සැප්තැම්බර් 21 ජනාධිපතිවරණය පැවැත්වෙන බව මැතිවරණ කොමිෂන් සභාව විසින් නිවේදනය කරනු ලැබීමෙන් පසුව අගෝස්තු මස 14 වැනිදින තෙක් ඇප මුදල් තැන්පත් කිරීමත් අගෝස්තු මස 15 උදේ 9 සිට 11.30 තෙක් නාම යෝජනා භාර ගැනීමත් සිදු වුණා.

ඉන් පසුවයි තැපැල් ඡන්දය සලකුණු කිරීම සඳහා සැප්තැම්බර් මස 04,05 හා 06 යන තෙදින දිවයින පුරා තැපැල් කාර්‍යාල මුල් කරගනිමින් ශ්‍රී ලංකා තැපැල් දෙපාර්තමේන්තුවේ ද පූර්ණ සහාය ඇතුව සිදු කෙරුණේ.

ඒ අනුව එම දින 03 තුළ තැපැල් ඡන්දය භාවිත කිරීම 98%ක ප්‍රතිශතයක් බව නියෝජ්‍ය තැපැල්පති රාජිත රණසිංහ ද ඊයේ (10) පැවති මාධ්‍ය හමුවකදී ප්‍රකාශ කළ අතර නිල ඡන්ද පත්‍රිකා මිලියන 10ක් ද මේ වනවිට ගෙයින් ගෙට බෙදා හැර අවසන් බව ද සඳහන් කළා.

එවන් වටපිටාවක් තුළ දියි අද සහ හෙට යන දෙදින අතිරේක තැපැල් ඡන්ද සලකුණු කිරීමේ කාලයක් ලබා දී ඇත්තේ.

මෙම සලකුණු කිරීම් ප්‍රදේශවල දිස්ත්‍රික් ලේකම් කාර්‍යාල පරිශ්‍ර කේන්ද්‍ර කරගනිමින් පැවැත්වෙනවා.