දෙමටගොඩ ‘සියපත් සෙවණ’ මහල් නිවාස සංකීර්ණය ඉදිරිපිට නතර කර තිබූ ත්‍රීරෝද රථ 06ක් සහ මෝටර් රථයක් සැක කටයුතු ලෙස හදිසියේ ම ගිනිගෙන සම්පූර්ණයෙන් ම විනාශ වී තිබෙනවා.
අද (06) අලුයම මෙම ගින්න හටගෙන ඇති බවයි දෙමටගොඩ පොලිසිය පැවසුවේ.
මෙලෙස හදිසියේ ම ගින්නක් ඇති වීමට පදනම් වූයේ කුමන හේතුවක් දැයි මෙතෙක් හෙළි වී නැහැ.
එබැවින් සිද්ධිය පිළිබඳ ව පුළුල් විමර්ශන දෙමටගොඩ පොලිසිය විසින් ක්‍රියාත්මක කරනු ලබනවා.
මේ අතර මෙම සිදුවීම සිදු වූ ස්ථානය නිරීක්ෂණය කිරීමට පාර්ලිමේන්තු මන්ත්‍රී වෛද්‍ය නජිත් ඉන්දික ඇතුළු ආණ්ඩු පක්ෂයේ පිරිසක් අද දහවල් පැමිණියා.
එහිදී ගිනිගත් ත්‍රීරෝද රථවල හිමිකරුවන් සමග සාකච්ඡා කිරීමේ දී අනාවරණය වී ඇත්තේ ත්‍රීරෝද රථ ධාවනය සිය ජීවනෝපාය කරගත් පිරිසකගේ වාහන මෙලෙස ගිනිගෙන ඇති බවයි.
එබැවින් ආණ්ඩුව සාකච්ඡා කර අදාළ පාර්ශ්වයන්ට වන්දි පිරිනැමිය හැකි දැයි සලකා බලන බව ද මන්ත්‍රීවරයා සඳහන් කළා.
