තංගල්ල මූලික රෝහලේ මෘත ශරීරාගාරයේ ඉඩ පහසුකම් නොමැති වීම හේතුවෙන් මෘත ශරීර මතට අයිස් දමා ඒවා මෘත ශරීරාගාරය ඉදිරිපිට ට්රොලිවල තැන්පත් කර කොරිඩෝවේ තබා ඇති ආකාරය දක්නට ලැබෙන බව අප වාර්තාකරු සඳහන් කළා.
බෙලිඅත්ත, නාකුළුගමුව, රන්න, අඟුණකොළපැලැස්ස, වීරකැටිය ආදී ප්රාදේශීය සහ දිසා රෝහල්වලදී මියගිය පුද්ගලයන් මෙන්ම හදිසි අනතුරුවලින් මියයන පුද්ගලයන්ගේ මෘත ශරීර පශ්චාත් මරණ පරීක්ෂණ සඳහා ද තංගල්ල මූලික රෝහලට රැගෙන එන අතර පශ්චාත් මරණ පරීක්ෂණ කටයුතු අවසන් වනතුරු එම සිරුරු තංගල්ල මූලික රෝහලේ මෘත ශරීරාගාරයේ තැන්පත් කෙරෙන බවයි වාර්තා වන්නේ.
කෙසේවෙතත් රෝහලට ප්රමාණවත් තරම් ශීතාගාර පහසුකම් නොමැතිවීම හේතුවෙන් දේහයන් මෘත ශරීරාගාරය ඉදිරිපිට ට්රොලිවල තැන්පත් කර කොරිඩෝවේ තබා ඇති බව සඳහන්.
තංගල්ල මූලික රෝහලේ පැරණි මෘත ශරීරාගාරයේ එක්වර මෘත ශරීර හයක් තැන්පත් කර තැබිය හැකි ශිතාගාරයක් තිබී ඇති අතර එම ශීතාගාරය නැවත ප්රතිසංස්කරණය කළ නොහැකි අන්දමින් මේ වන විට අබලන්ව පවතින බවයි පැවසෙන්නේ.
නව මෘත ශරීරාගාරයේ දැනට ඇත්තේ එක්වර සිරුරු දෙකක් පමණක් තැන්පත් කළ හැකි ශීතාගාරයක් වන අතර එය තංගල්ල මූලික රෝහලට ප්රමාණවත් නොවන බවයි රෝහල් කාර්යය මණ්ඩලය සදහන් කළේ.
මේ ආකාරයෙන් සිරුරු ට්රොලි මත තබා සිරුරු නරක් නොවී කල් තබා ගැනීමට ඒවා මතින් අයිස් දමා දැමීමට රෝහල් කාර්යය මණ්ඩලයට සිදුව තිබෙනවා.
මියගිය පුද්ගලයන්ගේ ඥාතීන් ලවා අයිස් ගෙන්වා ගන්නා අතර එම පුද්ගලයෝ ද මේ හේතුවෙන් දැඩි අසීරුතාවට පත්ව සිටිනවා.
මෘත ශරීරාගාරයේ ඉඩ පහසුකම් ගැටලුව සම්බන්ධයෙන් දීර්ඝ කාලයක් තිස්සේ සෞඛ්ය බලධාරින් දැනුවත් කිරීමට රෝහල් කාර්ය මණ්ඩලය පියවර ගෙන තිබුණද ඉන් මෙතෙක් ඵලක් වී නැහැ.
