ඩෙංගු හෝ චිකුන්ගුන්‍යා රෝගය වැළඳුණු දරුවන් එම රෝගී තත්ත්වයෙන් සම්පූර්ණයෙන් ඉවත් වන තුරු පෙර පාසල් හෝ පාසල් යැවීමෙන් වළකින ලෙස රිජ්වේ ආර්‍යා ළමා රෝහලේ ළමා රෝග විශේෂඥ වෛද්‍ය දීපාල් පෙරේරා පවසනවා.
අද (13) පැවති මාධ්‍ය හමුවකට එක්වෙමින් විශේෂඥ වෛද්‍යවරයා පැවසුවේ, අසනීප තත්ත්වයෙන් පසුවන දරුවන් පාසල් හෝ පෙරපාසල් යැවීමෙන් කෙළි සෙල්ලම් කටයුතු කිරීමට යොමු වීමෙන් විඩාවට පත් ව, ඔවුන්ගේ හෘද වස්තුවට හානි විය හැකි බවයි.
රෝගය වැළඳුණු දරුවෙකු ඉන් ආරක්ෂා කරගැනීමට නම් මදුරු දෂ්ටනයෙන් වැළකී සිටීමට මදුරු දැල් ආදිය භාවිත කිරීම කළ යුතු බව ද වෛද්‍ය දීපාල් පෙරේරා පෙන්වා දෙනවා.
ඩෙංගු හෝ චිකුන්ගුන්‍යා යන රෝග ද්විත්වයම වැළඳුණු දරුවන් කිසිවෙකුට ස්වාභාවික දියර පානයන් දීම හැර රතු හෝ කළු පැහැති ආහාරපාන දීමෙන් වළකින ලෙසයි විශේෂඥ වෛද්‍යවරයා උපදෙස් දෙන්නේ.
චිකුන්ගුන්‍යා නොවී දරුවාට වැළඳී ඇත්තේ ඩෙංගු රෝගය නම්, වැඩි වශයෙන් වෙහෙසට පත් වුවහොත් ජීවිත හානි පවා සිදු විය හැකි බවටත් සෞඛ්‍ය අංශ අනතුරු අඟවා තිබෙනවා.
එබැවින් එම රෝග වැළඳුණු දරුවන් ව පෙරටත් වඩා සැලකිල්ලෙන් රැකබලා ගත යුතු බවයි විශේෂ වෛද්‍ය දීපාල් පෙරේරා දෙමාපියන්ගෙන් සහ වගකිව යුතු පුද්ගලයින්ගෙන් ඉල්ලා සිටින්නේ.
