මේ වන විට ඩෙංගු රෝගය වැළඳී ඇති පුද්ගලයින්ගෙන් 88% කටම ඩෙංගු 02 ප්‍රභේදය වැළඳී ඇති බවට හඳුනාගෙන ඇති බව
ජාතික ඩෙංගු මර්ධන ඒකකයේ වැඩ බලන අධ්‍යක්ෂ වෛද්‍ය කපිල කන්නන්ගර පවසනවා.
මෙම ඩෙංගු 02 ප්‍රභේදයට ජනතාව තුළ ඇති ප්‍රතිශක්තිය ඉතා අඩු බව සඳහන් කරන වෛද්‍යවරයා මේ හේතුවෙන් රෝගී බවට පත්වීමේ හැකියාව වැඩි බවයි පැවසුවේ.
මේ අතර බස්නාහිර පළාත තුළ ඩෙංගු රෝගය පාලනය කරගත හැකි නම්, අනෙකුත් දිස්ත්‍රික්කවල රෝගය ව්‍යාප්තිය අඩුකරගත හැකි බවයි වෛද්‍ය කපිල කන්නන්ගර වැඩිදුරටත් සඳහන් කළේ.
දෛනිකව බස්නාහිර පළාතට වෙනත් පළාත්වලින් මහජනතාව විශාල වශයෙන් පැමිණෙන බව සඳහන් කරන වෛද්‍යවරයා, කොළඹ දිස්ත්‍රික්ක ඇතුළු බස්නාහිර පළාත තුළ රෝගීන් සංඛ්‍යාව ඉහළ යාම තුළ එලෙස පැමිණෙන නිරෝගී පුද්ගලයින් ද රෝගයට ගොදුරු වී රෝගයත් සමඟ ඔවුන්ගේ දිස්ත්‍රික්ක සහ ප්‍රදේශවලට යන බවයි පැවසුවේ.
ඒ, අනුව රට තුළ තව තවත් රෝගය පැතිරීමක් සිදුවන බවයි ඔහු අවධාරණය කර සිටියේ.
