ආගමන විගමන පාලකවරයා වෙත ව්යාජ තොරතුරු ඉදිරිපත්කර විදේශ ගමන් බලපත්රයක් ලබා ගැනීම සහ වලංගු වීසා බලපත්ර නොමැතිව ශ්රී ලංකාව තුළ රැඳී සිටිමින් ආගමන විගමන පනත උල්ලංඝනය කළ බව කියන සිද්ධියකට අදාළව හිටපු රාජ්ය අමාත්ය ඩයනා ගමගේට එරෙහිව අපරාධ පරීක්ෂණ දෙපාර්තමේන්තුව විසින් පවරා ඇති නඩුවේ මූලික සාක්ෂි විභාගය කොළඹ ප්රධාන මහෙස්ත්රාත් අසංග එස්. බෝදරගම හමුවේ අද (30) ආරම්භ කෙරුණා.
සැකකාර ඩයනා ගමගේට එරෙහිව අපරාධ පරීක්ෂණ දෙපාර්තමේන්තුව වෙනුවෙන් චෝදනා හතක් ගොනු කර ඇති අතර ඉන් එක් චෝදනාවකට අදාළ නඩු විභාගය අද (30) ආරම්භ විය.
එම චෝදනාව වන්නේ 2016 වසරේ ජූලි මස 14 වැනි දින සිට 2017 ජූලි මස 16 වැනි දින අතර කාලය තුළ වලංගු වීසා බලපත්රයක් නොමැතිව මෙරට තුළ රැඳී සිටීමයි.
ආගමන විගමන දෙපාර්තමේන්තුවේ සේවයේ නියුතුව පරිපාලන නිලධාරිනියක් වන හංසිකා කුමාරසිරි අධිකරණයේදී සාක්ෂි ලබා දුන්නා.
රජයේ අධි නීතිඥ අකිලා ධර්මදාදුගේ සාක්ෂි මෙහෙයුම යටතේ සාක්ෂි විභාග කෙරුණා.
සෙසු සාක්ෂිකරුවන්ගේ සාක්ෂි ලබා ගැනීම දෙසැම්බර් 15 දින කැඳවීමට නියම කළා.
මෙම නඩුව කැඳවනු ලැබු අවස්ථාවේදී විත්තිකාර ඩයනා ගමගේ සහ සාක්ෂිකරුවන් අධිකරණය හමුවේ පෙනී සිටි අවස්ථාවේදී මෙලෙස නියෝග කෙරුණා.
ඉහත සඳහන් කළ සිද්ධිය සම්බන්ධයෙන් නීතිපතිවරයාගේ උපදෙස් ප්රකාරව අපරාධ පරීක්ෂණ දෙපාර්තමේන්තුව ඩයනා ගමගේ මහත්මියට එරෙහිව ගොනුකර තිබූ චෝදනා 7 පසුගිය නඩු වාරයේදී අධිකරණය හමුවේ කියවා දුන් අවස්ථාවේදී ඇය එම චෝදනාවන්ට නිවැරදිකාරිය බව ප්රකාශ කිරීම සැලකිල්ලට ගනිමින් මෙම නඩු විභාගය ආරම්භ කිරීමට නියමිතව තිබෙනවා.
එම චෝදනා හතට තමන් නිවැරදිකාරිය බවට සැකකාර ගමගේ මහත්මිය අධිකරණය හමුවේ ප්රකාශ කිරීමෙන් අනතුරුව ඇයව රුපියල් ලක්ෂ 5ක මුදල් හා රුපියල් මිලියන 10ක ශරීර වටිනා පෙර නියම කළ ඇප දෙකක් මත ඇය මුදා හරින ලෙසද පෙර නඩු දිනයේදී මහේස්ත්රාත්වරයා නියෝගකර තිබෙනවා.
2016 වසරේ ජූලි මස 14 වැනි දින සිට 2017 ජූලි මස 16 වැනි දින අතර කාලය තුළ වලංගු වීසා බලපත්රයක් නොමැතිව මෙරට තුළ රැඳී සිටීම,2018 ජූලි මස 17 දින සිට 2019 ජූලි මස 16 දින කාලය අතරතුර වලංගු වීසා බලපත්රයක් නොමැතිව මෙරට තුළ රැඳී සිටීම,2020 ජූලි මස 16 දින හා 2020 නොවැම්බර් මස 01 කාලය අතරතුර වලංගු වීසා බලපත්රයක් නොමැතිව මෙරට තුළ රැඳී සිටීම,2020 ජූලි මස 17 වැනි දින සිට 2020 නොවැම්බර් මස පළමුවැනි දින දක්වා කාලය අතරතුර වලංගු වීසා බලපත්රයක් නොමැතිව මෙරට තුළ රැඳී සිටීම,2014 ජනවාරි මස 20 දින හෝ ඊට ආසන්න දිනකදී බත්තරමුල්ලේ පිහිටි ආගමන විගමන දෙපාර්තමේන්තුවට විදේශ ගමන් බලපත්රයක් නිකුත් කිරීමට අදාළ අයදුම් පත්රයක් ඉදිරිපත් කිරීමේදී ආගමන විගමන පාලකවරයා හට අසත්ය ප්රකාශ ඉදිරිපත් කිරීම ,ඇතුළු චෝදනා හතකට අදාළව නීතිපතිවරයාගේ උපදෙස් ප්රකාරව අපරාධ පරීක්ෂණ දෙපාර්තමේන්තුව මගින් ඇයට එරෙහිව අධිකරණය හමුවේ ගොනුකර තිබූ චෝදනාවන්.
නඩු භාණ්ඩයක් ලෙස අපරාධ පරීක්ෂණ දෙපාර්තමේන්තුව මගින් අධිකරණයට ඉදිරිපත් කළ විත්තිකාරියගේ රාජ්ය තාන්ත්රික ගමන් බලපත්රය අධිකරණ සේප්පුවේ තැබීමට ද මහේස්ත්රාත්වරයා පෙර නඩු දිනයේදි නියෝගකර තිබුණා.
බ්රිතාන්ය පුරවැසිකමක් හිමි ඩයනා ගමගේ මහත්මියට මෙරට පාර්ලිමේන්තුවේ මන්ත්රී ධූරයක් දැරීමට නුසුදුසු අයකු බවට ශ්රේෂ්ඨාධිකරණය තීරණය කළ බව ද අපරාධ පරීක්ෂණ දෙපාර්තමේන්තුව අධිකරණයට දැනුම් දී තිබෙනවා.
මේ වනවිට ඩයනා ගමගේ ඇප මත මුදා හැර සිටින බවද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නා.
