චීන කොමියුනිස්ට් පක්ෂයේ ආරාධනයක් අනුව මේ දිනවල (ජුනි 11) චීනයේ සංචාරයක නිරත ව සිටින, ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා ඇතුළු පිරිස ඊයේ (10) ‘ද චිං’ ප්‍රාදේශිකයේ වුස ගම්මානයේ ජාත්‍යන්තර භූගෝලීය තොරතුරු මධ්‍යස්ථානයක සහ චිං ප්‍රාදේශිකයේ වෙට් වයිප්ස් (Wet wipes) නිෂ්පාදන කර්මාන්ත ශාලාවක් නැරඹීමට එක් වුණා.
එහිදී, වූස ගම්මානයේ ප්‍රධානීන් සහ හූ ජෝ නගරයේ උප නගරාධිපති ඇතුළු නියෝජිතයින් සමග සාකච්ඡාවක් ද සිදු කෙරුණු බවයි වාර්තා වන්නේ.
නවීන තාක්ෂණය ද යොදා ගනිමින් වූසූ ගමේ කසළ ප්‍රශ්නය විසඳා ඇති ආකාරය පිළිබඳ ව මෙහිදී විශේෂ අවධානයක් යොමු කෙරුණා.
ගමේ සංවර්ධනය සඳහා කාන්තාවන් විශේෂ දායකත්වයක් ලබාදෙන බවයි මෙම සාකච්ඡාවේ දී අනාවරණය කෙරුණේ.
වගාවන් සඳහා රසායනික පොහොර සහ කෘමිනාශක ද්‍රව්‍ය භාවිතයේ දී චීන මධ්‍යම රජය හඳුන්වා දී ඇති ප්‍රමිතීන් අනුගමනය කිරීම අනිවාර්යය බව ද ගමේ ජනතාව එම පරාමිතීන් නිසි ලෙස අනුගමනය කරමින් වගා කටයුතු කරන බව ද එහිදි අනාවරණය වුණා.
මෙම අවස්ථාව සඳහා තරුණ කටයුතු නියෝජ්‍ය ඇමති එරංග ගුණසේකර, ජාතික ඒකාබද්ධතා නියෝජ්‍ය ඇමති මුනීර් මුලෆ්ෆර් ඇතුළු පිරිසක් එක් වී සිටි අතර හූ ජෝ නගරයේ උප නගරාධිපති ජන් ශින්යු, හූ ජෝ නගරයේ ද චිං ප්‍රාදේශිකයේ උප නගරාධිපතිනිය වන ෂී මින්ලී, වුස ගම්මානයේ චීන කොමියුනිස්ට් පක්ෂ ලේකම් සහෝදරයා ඇතුළු නියෝජිත පිරිසක් එක්ව සිටියා.
