ටිබෙට් ස්වදේශික කලාපයේ හිටපු රජයේ ප්‍රධානියා මෙන්ම චීන කොමියුනිස්ට් පක්ෂයේ ජ්‍යෙෂ්ඨ නිලධාරියෙක් වූ යාන් ජින්හායි හට මහා පරිමාණ දූෂණ සහ අල්ලස් ලබාගැනීමේ චෝදනා මත ජීවිතාන්තය දක්වා සිරදඬුවම් නියම කිරීමට චීන අධිකරණයක් පියවර ගෙන ඇති බව ෂින්හුවා පුවත් සේවය වාර්තා කරනවා.
අධිකරණ වාර්තාවලට අනුව, යාන් ජින්හායි වසර ගණනාවක් පුරා සිය නිල බලය අනිසි ලෙස භාවිත කරමින් ව්‍යාපෘති කොන්ත්‍රාත්තු ලබාදීම, ව්‍යාපාරික කටයුතු සඳහා අනුග්‍රහය දැක්වීම සහ නිලධාරීන්ට උසස්වීම් ලබාදීම වෙනුවෙන් චීන යුවාන් මිලියන ගණනක මුදල් හා දේපළ අල්ලස් වශයෙන් ලබාගෙන ඇති බව තහවුරු වී තිබෙනවා.
සිරදඬුවමට අමතරව ඔහුගේ දේශපාලන අයිතිවාසිකම් සදහටම අහෝසි කිරීමටත්, ඔහු සතු සියලුම පෞද්ගලික දේපළ රාජසන්තක කිරීමටත් අධිකරණය නියෝග කළා.
චීන ජනාධිපති ෂී ජින්පින්ග් විසින් දූෂණයට එරෙහිව දියත් කර ඇති දැඩි මර්දන ක්‍රියාවලිය (Anti-corruption drive) යටතේ මෑත කාලයේදී ඉහළම දඬුවමක් ලැබූ ටිබෙට් කලාපයේ ප්‍රධානතම නිලධාරියා මොහුයි.
කෙසේ වෙතත්, ටිබෙට් වැසියන් සහ මානව හිමිකම් සංවිධාන පෙන්වා දෙන්නේ මෙම දූෂණ විරෝධී මෙහෙයුම් මඟින් චීන රජය තමන්ට පක්ෂපාතී නොවන සහ ටිබෙට් අනන්‍යතාවය වෙනුවෙන් පෙනී සිටින දේශපාලන නායකයන් ඉවත් කිරීමට කටයුතු කරන බවයි.
