ට්‍රම්ප් යළි මෝදිට තර්ජනය කරයි

රුසියානු තෙල් මිලදී ගැනීම සම්බන්ධයෙන් ඇමරිකානු ජනාධිපති ඩොනල්ඩ් ට්‍රම්ප් ඉන්දියාවට නැවතත් තර්ජනය කර තිබෙනවා.

ඒ, අනුව ඉන්දියානු භාණ්ඩ සඳහා තීරුබදු සැළකිය යුතු ලෙස ඉහළ නංවන බව ට්‍රම්ප් අනතුරු අඟවනවා.

“ඉන්දියාව රුසියානු තෙල් විශාල ප්‍රමාණයක් මිලදී ගන්නවා පමණක් නොව, මිලදී ගත් තෙල්වලින් වැඩි ප්‍රමාණයක් විවෘත වෙළඳපොළේ විශාල ලාභයක් සහිතව විකුණනවා. නමුත් රුසියානු යුද මැෂින් නිසා යුක්‍රේනයේ කීදෙනෙක් මිය යනවාද යන්න සම්බන්ධයෙන් ඔවුන් කිසිම තැකීමක් කරන්නේ නැහැ” ට්‍රම්ප් සිය Truth Social ගිණුමේ සටහනක සඳහන් කළා.

“මේ නිසා, ඉන්දියාව විසින් ඇමරිකා එක්සත් ජනපදයට ගෙවන තීරුබදු සැළකිය යුතු ලෙස ඉහළ නංවන්නෙමි. මේ පිළිබඳ අවධානය යොමු කිරීම ගැන ස්තූතියි” යයි ඔහු සඳහන් කර ඇත්තේ, තමන් අදහස් කළේ කුමන තීරුබදු මට්ටමද යන්න සඳහන් නොකරමින්.

ඉන්දීය විදේශ අමාත්‍යාංශයේ ප්‍රකාශකයෙකු ට්‍රම්ප්ට ප්‍රතිචාර දක්වමින් රොයිටර්ස් වෙත පවසා ඇත්තේ ඉන්දියාව “තම ජාතික අවශ්‍යතා සහ ආර්ථික ආරක්ෂාව සසහා අවශ්‍ය සියලු පියවර ගන්නා” බවයි.

ඉන්දියාව ඉලක්ක කර ගැනීම අසාධාරණ සහ පදනම්විරහිත බව ප්‍රකාශකයා තවදුරටත් පැවසූ බව රොයිටර්ස් වාර්තා කරනවා.

2022 මුල් භාගයේදී රුසියාව යුක්‍රේනය ආක්‍රමණය කළ දා සිට මොස්කව් වෙතින් ඈත් වීමට ඉන්දියාවට බටහිර රටවලින් බලපෑම් එල්ල වී තිබෙනවා.

රුසියාව සමඟ එහි දිගුකාලීන සබඳතා සහ ආර්ථික අවශ්‍යතා උපුටා දක්වමින් නව දිල්ලිය ඊට එකඟ වූයේ නැහැ.

රුසියාව සමඟ කරන වෙළෙඳ ගනුදෙනු සැලකිල්ලට ගෙන ට්‍රම්ප් දැනටමත් ඉන්දීය භාණ්ඩ සඳහා සියයට 25ක තීරු බද්දක් පනවා තිබෙනවා.

අන්‍යෝන්‍ය තීරු බදු සම්බන්ධයෙන් ඇමෙරිකාව සමග වෙළෙඳ ගිවිසුමකට එළැඹීමට ඉන්දියාව පසුගිය මාස කිහිපය පුරා සාකච්ඡාවල නිරත වුවද එය තවමත් අවසන් නැහැ.

රුසියානු තෙල් මිලදී ගැනීම සම්බන්ධයෙන් ඉන්දීය රජයේ ඉහළ පෙළේ මූලාශ්‍ර දෙකක් උපුටා දක්වමින් රොයිටර්ස් සෙනසුරාදා වාර්තා කළේ ඉන්දියාව අඛණ්ඩව රුසියාවෙන් තෙල් මිලදී ගන්නා බවයි.

රුසියාවෙන් seaborne බොරතෙල් මිලදී ගන්නා විශාලතම ගැනුම්කරුවා වන්නේ ඉන්දියාවයි.

මේ වසරේ ජනවාරි සිට ජුනි දක්වා කාලයේදී ඉන්දියාව අවම වශයෙන් දෛනිකව බොරතෙල් බැරල් මිලියන 1.75ක් රුසියාවෙන් ආනයනය කරන බව රොයිටර්ස් වාර්තා කරනවා.

එය පසුගිය වසරේ අනුරූප කාලයට සාපේක්ෂව සියයට එකක වර්ධනයක්.