ඇමරිකාවේ හිටපු ජනාධිපති ඩොනල්ඩ් ට්රම්ප් ඉලක්කකර ගනිමින් එල්ල වූ වෙඩි ප්රහාරයෙන් පසු ඔහුගේ දියණිය වන ඉවන්කා ට්රම්ප් විශේෂ ප්රකාශයක් සිදුකර තිබෙනවා.
සිය එක්ස් ගිණුමට සටහනක් එක්කරමින් ඉවන්කා ට්රම්ප් පවසන්නේ, තම පියාට සහ පෙන්සිල්වේනියාවේ බට්ලර්හි දී ප්රචණ්ඩත්වයට ගොදුරු වූ අනෙක් අය වෙනුවෙන් සිදුකළ යාච්ඤාවලට සහ දැක්වූ ආදරයට ස්තූතිවන්ත වන බවයි.
“රහස් සේවයට සහ අනෙකුත් සියලුම නීතිය ක්රියාත්මක කරන නිලධාරීන්ට ඔවුන්ගේ ඉක්මන් හා තීරණාත්මක ක්රියාමාර්ග ගැන මම ස්තුතිවන්ත වෙනවා. මම අපේ රට වෙනුවෙන් දිගටම යාඥා කරනවා. මම ඔයාට ආදරෙයි තාත්තේ, හැමදාමත්.” යනුවෙන් ඉවන්කා වැඩිදුරටත් එහි සඳහන් කර තිබුණා.
මේ අතර ඇමරිකානු උප ජනාධිපති කමලා හැරිස් පවසන්නේ ට්රම්ප්ට බරපතල තුවාල සිදු නොවීම සහනයක් ගෙන දෙන්නක් බවයි.
ට්රම්ප්ට සහ ඔහුගේ පවුලේ අයට මෙන්ම මෙම වෙඩි තැබීමෙන් තුවාල ලැබූ සහ බලපෑමට ලක් වූ සියලු දෙනා වෙනුවෙන් යාඥා කරන බවයි කමලා හැරිස් නිවේදනයක් නිකුත් කරමින් කියා සිටියේ.
එමෙන්ම මෙවැනි ප්රචණ්ඩත්වයට අපගේ ජාතියේ තැනක් නොමැති බවත්, අපි සැවොම මෙම පිළිකුල් සහගත ක්රියාව හෙළා දැකිය යුතු බවත් ඇය පවසනවා.
පෙන්සිල්වේනියාවේ බට්ලර් හි පැවති මැතිවරණ රැළියක් අතර තුර හිටපු ජනාධිපතිවරයා මෙලෙස වෙඩි ප්රහාරයකට ලක් වූ අතර, වෙඩි ප්රහාරයෙන් ඔහුගේ දකුණු කන ප්රදේශයට තුවාල සිදුව තිබුණා.
මේ අතර රැළියට සහභාගී වී සිටි අයෙක් විදෙස් මාධ්ය වෙත පවසා ඇත්තේ වෙඩි හඬ නැඟීමට පෙර රයිෆලයක් අතැතිව මිනිසෙකු අසල වහලක් මත බඩගාමින් සිටිනු දුටු බවයි.
මෙම වෙඩි ප්රහාරයෙන් මැතිවරණ රැළියේ ප්රේක්ෂකාගාරයේ සිටි එක් අයෙක් ජීවිතක්ෂයට පත්ව තවත් දෙදෙනෙකු බරපතල තුවාල ලබා තිබෙනවා.
මේ අතර FBI රහස් ඔත්තු සේවය සඳහන් කළේ වෙඩි තැබීම සිදුකළ සැකකරු ආරක්ෂක අංශ විසින් එල්ල කළ වෙඩි ප්රහාරයකින් මියගොස් ඇති බවයි.
ඩොනල්ඩ් ට්රම්ප්ට එල්ල වූ වෙඩි ප්රහාරය කැමරාවක සටහන්ව තිබුණේ මෙලෙසින්.
wpDiscuz
