ආණ්ඩුක්රම ව්යවස්ථාවේ 19 වන සංශෝධනය ජනමත විචාරණයකට යොමු නොකර ජනාධිපතිවරණයක් පැවැත්වීමට එරෙහිව ගොනු කර ඇති මූලික අයිතිවාසිකම් පෙත්සම සලකා බැලීම අද (15) දිනයේ සිදු කිරීමට නියමිතයි.
ඒ, එම පෙත්සම සලකා බැලීම වෙනුවෙන් පත් කළ විශේෂ ත්රිපුද්ගල ශ්රේෂ්ඨාධිකරණ විනිසුරු මඩුල්ලක් හමුවෙයි.
අගවිනිසුරු ජයන්ත ජයසූරිය, අර්ජුන ඔබේසේකර සහ ප්රියන්ත ප්රනාන්දු යන මහත්වරුන්ගෙන් එම විශේෂ ශ්රේෂ්ඨාධිකරණ විනිසුරු මඩුල්ල සමන්විත වනවා.
ආණ්ඩුක්රම ව්යවස්ථාවේ 19 වන සංශෝධනය විධිමත් ආකාරයෙන් සම්මත වී නොමැති වීම හේතුවෙන් එය ජනමත විචාරණයකට යොමු කර ඉන් අනුමැතිය ලබාගන්නා තෙක් ජනාධිපතිවරණයක් පැවැත්වීම ආණ්ඩුක්රම ව්යවස්ථාව උල්ලංඝනයවන බවට තීන්දුවක් ලබාදෙන ලෙස ඉල්ලා නීතිඥ අරුණ ලක්සිරි උණවටුන විසිනුයි අදාළ පෙත්සම ගොනුකර ඇත්තේ.
එහි වග උත්තරකරුවන් ලෙස මැතිවරණ කොමිසම සහ එහ සාමාජිකයින්, පාර්ලිමේන්තු මහ ලේකම්වරයා සහ නීතිපතිවරයා නම් කර තිබෙනවා.
පෙත්සම්කරු කියා සිටින්නේ ආණ්ඩු ක්රම ව්යවස්ථාවේ 19 වන සංශෝධනය තුළින් ආණ්ඩුක්රම ව්යවස්ථාවේ 70 වන ව්යවස්ථාව සංශෝධනය කොට තේරී පත්වෙන පාර්ලිමේන්තුවක් වසරක් ගෙවී යාමෙන් පසුව විසුරුවා හැරීමට ජනාධිපතිවරයා සතු බලය අහිමි කිරීමට කටයුතු කර ඇති බවයි.
එම සංශෝධනය ජනමත විචාරණයකට යොමු කළ යුතු බවට ශ්රේෂ්ඨාධිකරණ විනිසුරු මඩුල්ලක් විසින් තීන්දු කර තිබුණ ද එය ජනමත විචාරණයකින් මේ දක්වා අනුමත වී නොමැති බවයි පෙත්සම්කරු කියා සිටින්නේ.
එම සංශෝධනය ජනමත විචාරණයකින් අනුමත වී ජනාධිපතිවරයා ඊට අත්සන් තබා නොමැති නිසා එය නීතියක් වශයෙන් සැලකිය නොහැකි බවත් පෙත්සම්කරු පවසනවා.
එසේ තිබියදී 19 වන සංශෝධනය තවදුරටත් නීතියක් වශයෙන් පිළිගෙන කටයුතු කිරීම වැරදි සහගත බවත් ඔහු පෙන්වා දෙනවා.
ආණ්ඩුක්රම ව්යවස්ථාවේ 19 වන සංශෝධනය ජනමත විචාරණයකින් අනුමත කිරීමකින් තොරව ජනාධිපතිවරයාගේ නිල කාලය වසර 05ක් ලෙස සලකා ජනාධිපතිවරණයක් පැවැත්වීමට යාම තුළින් මැතිවරණ කොමිෂන් සභාව මෙරට ආණ්ඩුක්රම ව්යවස්ථාව උල්ලංඝනය කරන බවත් ඔහු චෝදනා කළා.
මේ තුළින් මහජනතාවගේ මූලික අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙසත් පෙත්සමෙන් ඉල්ලා තිබෙනවා.
