තමන් ඇතුළු කැබිනට් අමාත්‍යවරුන් තුන් දෙනෙකු එම ධුරවලින් ඉවත් කිරීමට ජනාධිපතිවරයා පියවර ගන්නේ නම්, ඒ පිළිබඳ කිසිදු ගැටලුවක් නොමැති බව පිවිතුරු හෙළ උරුමයේ නායක අමාත්‍ය උදය ගම්මන්පිල ප්‍රකාශ කළා.
ඔහු මේ බව සඳහන් කළේ, වාසුදේව නානායක්කාර, විමල් වීරවංශ හා උදය ගම්මන්පිල යන අමාත්‍යවරුන් කැබිනට් මණ්ඩලයේ සාමාජිකයන් ලෙස සිටිමින්, යුගදනවි ගිවිසුම සම්බන්ධ කැබිනට් තීරණයට එරෙහි ව අධිකරණයට යාම සහ එය ප්‍රසිද්ධියේ විවේචනය කිරීම වැරදි බවට ජනාධිපතිවරයා ප්‍රකාශ කළ බවට අද පළ වී තිබූ පුවත්පත් වාර්තාවලට පිළිතුරු ලබාදෙමින්.
පුවත්පත් කතුවරුන් සමඟ ඊයේ ජනාධිපති මන්දිරයේ පැවති සාකච්ඡාවක දී ජනාධිපතිවරයා මේ බව ප්‍රකාශ කර තිබූ බව අද, ජාතික පුවත්පත් වාර්තා කර තිබුණා.
කැබිනට් තීන්දුවකට එරෙහි ව අධිකරණයට යන්නේ නම් අමාත්‍ය ධුරය ඉවත් වී එය සිදු කළ යුතු බව ජනාධිපතිවරයා එහි දී සඳහන් කළ බවයි එම වාර්තාවල දක්වා තිබුණේ.
මේ සම්බන්ධයෙන් අද මාධ්‍ය වෙත අදහස් දක්වමින් අමාත්‍ය උදය ගම්මන්පිල කියා සිටියේ, යුගදනවි ගිවිසුම සම්බන්ධයෙන් තමන් ඇතුළු අමාත්‍යවරුන් තිදෙනා කිසිදු වරදක් සිදු කර නොමැති බවයි.
අවධානම දනිමින් සහ අවදානම ගනිමින් යුගදනවි ගිවිසුම පිළිබඳ ඇත්ත උසාවියට සහ රටට හෙළිකිරීමට තීරණය කළ බවත් ජනාධිපතිවරයාට ඕනෑම අවස්ථාව ඇමති ධූරවලින් ඉවත් කළ හැකි යැයි හොඳන් දන්නා බවයි බලශක්ති අමාත්‍ය උදය ගම්මන්පිල ප්‍රකාශ කර ඇත්තේ.
යුගදනවි ගිවිසුම පිළිබඳ ගත් ක්‍රියාමාර්ගය වැරැදී යැයි ජනාධිපතිවරයා පැවසීම ඒතුමාගේ මතය බව පැවසූ අමාත්‍ය උදය ගම්මන්පිල, එය හෙළිකිරීම වැරැද්දක් නොවන බව තමන් ඇතුළු මන්ත්‍රීවරුන්ගේ මතය බව ද සඳහන් කර සිටියේ.
