ශ්‍රී ලංකාවේ එක්සත් අරාබි එමීර් රාජ්‍යයේ (UAE) තානාපති ගරු Khaled Nasser AlAmeri මහතා කතානායක අසෝක රන්වල මහතා හමු වී තිබෙනවා.
මෙම හමුවීම ඊයේ (9) පාර්ලිමේන්තු පරිශ්‍රයේ දී සිදු වූ බවයි වාර්තා වන්නේ.
මෙහිදී තානාපතිවරයා සඳහන් කළේ 2025 පෙබරවාරි මස පැවැත්වීමට නියමිත ලෝක රාජ්‍ය සමුළුව (WGS) ඇමතීමට එක්සත් අරාබි එමීර් රාජ්‍යයේ ජනාධිපතිවරයා විසින් මෙරට ජනාධිපති අනුර දිසානායක මහතාට ආරාධනා කිරීමට නියමිත බවයි.
2024 වසරේදී ඉන්දීය අගමැති නරේන්ද්‍ර මෝදි මහතා මෙම සමුළුව ඇමතූ බවත් හෙතෙම වැඩිදුරටත් පැවසුවා.
දූෂණයට එරෙහිව කටයුතු කිරීමට ඇති හොඳම ක්‍රමය රාජ්‍ය සේවය මෙහෙයවීම මාර්ගගත (Online) ක්‍රමය ඔස්සේ සිදු කිරීම බව මෙහිදි සඳහන් වූ අතර මේ සම්බන්ධයෙන් අවශ්‍ය වන විශේෂඥ දැනුම බෙදාගැනීමට තම රාජ්‍ය කැමැත්තෙන් සිටින බව ද තනාපතිවරයා මෙහිදී පෙන්වා දුන්නා.
විනිවිදභාවයෙන් යුතු ආකර්ෂණීය ආයෝජන ක්‍රවේදයන් සකස් කිරීමේ වැදගත්කම පිළිබඳව ද මෙහිදී සාකච්ඡා කෙරුණා.
එක්සත් අරාබි එමීර් රාජ්‍යයේ වෙසෙන ශ්‍රී ලාංකිකයන් වෘත්තීයමය දක්ෂතාවයෙන් යුතු සාමකාමී පිරිසක් ලෙස අගය කරන බව ද තානාපති Khaled Nasser AlAmeri මහතා මෙහිදි වැඩිදුරටත් පැවසුවා.
