කැනඩාවේ මුදල් අමාත්‍යවරිය චීනයේ නිෂ්පාදිත වාහනවලට එරෙහිව වෙළඳ බාධක පැනවීම පිළිබඳව ව්‍යාපාරික සහ කම්කරු කණ්ඩායම් සමඟ ලබන සතියේ සාකච්ඡා කරන බව පැවසූ අතර රජයට මෝටර් රථවලින් ඔබ්බට යා හැකි බව යෝජනා කළා.
විදුලි වාහනවල “අසාධාරණ චීන වෙළඳ පිළිවෙත්”වලට ප්‍රතිචාර දැක්විය යුතු ආකාරය පිළිබඳ මහජන උපදේශනයක් කැනඩා රජය විසින් පසුගිය මාසයේ නිවේදනය කරනු ලැබුවා.
නමුත් “උපදේශනය ඇත්ත වශයෙන්ම ඊට වඩා පුළුල් විය හැකිය:” මුදල් ඇමති ක්‍රිස්ටියා ෆ්‍රීලන්ඩ් සිකුරාදා සම්මුඛ සාකච්ඡාවක දී පැවසුවා.
එක්සත් ජනපදය සමඟ ද්වි-මාර්ග වෙළඳාම මත දැඩි ලෙස රඳා පවතින කැනඩාව, චීන EVs, සූර්ය කෝෂ, බැටරි, වානේ සහ අනෙකුත් නිෂ්පාදනවලට එරෙහිව ඉහළ තීරුබදු පැනවීමට බයිඩන් පරිපාලනයේ පියවරයන් සමීපව නිරීක්ෂණය කරනවා.
කැනඩාවට තම වෙළඳ සබඳතා ජාතික ආරක්ෂක කාචයකින් බැලීම හැර වෙනත් විකල්පයක් නොමැති බව නියෝජ්‍ය අගමැති ද වන ෆ්‍රීලන්ඩ් පැවසුවා.
බයිඩන් පරිපාලනය චීන භාණ්ඩ සඳහා තීරුබදු ඉහළ නැංවීමේ සැලසුම් එළිදැක්වීමෙන් පසුව සහ යුරෝපීය සංගමය චීන වාහන සඳහා සියයට 48ක් තරම් ඉහළ බදු ප්‍රකාශ කිරීමෙන් පසුව අගමැති ජස්ටින් ටෘඩෝගේ රජය මිත්‍ර පාක්ෂිකයින් හත් දෙනාගේ කණ්ඩායම සමඟ පෙලගැසීමට උත්සාහ කරනවා.
කැනඩාව දැනට චීන වාහන සඳහා සියයට 6 ක පමණ බද්දක් පනවා තිබෙනවා.
බටහිර රටවලින් එල්ල වන චෝදනා ප්‍රතික්ෂේප කරන චීනය, තීරුබදු හේතුවෙන් බීජිං සහ ඔටාවා අතර වෙළඳ සහ ආර්ථික සහයෝගීතාව අඩපණ කළ හැකි බවට ද අනතුරු අඟවනවා.
