චීන ගල් අඟුරු පතලක සිදුවූ පිපිරීමකින් අවම වශයෙන් 90 දෙනෙකු මිය ගොස් ඇති බව එරට රාජ්‍ය මාධ්‍ය වාර්තා කරනවා.
උතුරු චීනයේ ෂැන්සි පළාතේ ගල් අඟුරු පතලක මෙම පිපිරීම සිදුව ඇති අතර, තවත් 100 කට වැඩි පිරිසක් රෝහල් ගතකර ඇති බවයි වාර්තා වන්නේ.
සිය ගණනක් ගලවා ගැනීමේ නිලධාරීන් එම ස්ථානයට යොමුකර ඇති අතර, ගලවා ගැනීමේ කටයුතු තවමත් සිදුවෙමින් පවතින බවයි විදෙස් මාධ්‍ය වාර්තා කරන්නේ.
පිපිරීම සිදුවන අවස්ථාවේ එහි සේවකයින් 247 දෙනෙකු සේවය කරමි සිට තිබෙනවා.
චීන රාජ්‍ය මාධ්‍යවලට අනුව පිපිරීමට හේතුව තවමත් අනාවරණය වී නොමැති අතර පතල තුළ කාබන් මොනොක්සයිඩ් මට්ටම සීමා ඉක්මවා ගොස් ඇති බවට මේ වනවිට සොයාගෙන ඇති බවයි වාර්තා වන්නේ.
මේ අතර මුදා ගැනීමේ මෙහෙයුමට සහාය වීම සඳහා චීනයේ හදිසි කළමනාකරණ අමාත්‍යාංශය ගලවා ගැනීමේ කණ්ඩායම් හයකින් පුද්ගලයින් 345 දෙනෙකු යොමුකර ඇති බව සඳහන්.
චීනයේ දුප්පත්ම පළාත්වලින් එකක් වන ෂැන්සි, රටේ ගල් අඟුරු කැණීම් අගනුවර ලෙස හැඳින්වෙනවා.
