මෙරට මත්ද්‍රව්‍ය ජාලයේ ‘ගෝඩ් ෆාදර්’ ලෙස සැලකෙන ශිරාන් බාසික්ගේ පුත් නදීන් බාසික් ඇප මත නිදහස් කර තිබෙනවා.

මෙම සැකකරුව අද (28) අලුයම ඩුබායි රාජ්‍යයේ සිට දිවයිනට පැමිණීමේ දී වැල්ලවත්ත පොලිසිය, අපරාධ පරීක්ෂණ දෙපාර්තමේන්තුව හා ආගමන විගමන නිලධාරීන් එක්ව අත් අඩංගුවට ගනු ලැබුවා.

ඒ මෙම වසරේ පෙබරවාරි මස 16 වැනි දින හැව්ලොක් සිටි ඉදිරිපිට රාජකාරියේ නිරත ව සිටි පොලිස් විශේෂ කාර්‍යය බලකායේ නිලධාරියෙකු සිය මෝටර් රථයෙන් අනතුරට ලක් කර මිනීමැරීමට උත්සාහ දැරීමේ චෝදනාව සහ රිය අනතුරක් සිදු කර පලා යෑමේ චෝදනා මතයි.

සැකකරුව අද ගල්කිස්ස මහේස්ත්‍රාත් අධිකරණයට ඉදිරිපත් කෙරුණු අතර ඔහුට විදේශ ගමන් තහනමක් ද පනවනු ලැබුවා.

මොහු සන්තකයේ තිබී හෙරෙයොන්, රන් පවුම්, ඩොලර් ඇතුළු දෑ ද සොයා ගැනුණු අතර ඒවා නීතිමය ක්‍රියා සඳහා භාර දී ඇති බවත් වාර්තා වනවා.

ජනාධිපතිවරණයට තරග කිරීම සඳහා ජනාධිපති රනිල් වික්‍රමසිංහ මහතා නුසුදුස්සකු බව ප්‍රකාශ කරන ලෙස ඉදිරිපත් කරන ලද පෙත්සමක් විභාගයට ගැනීම ශ්‍රේෂ්ඨාධිකරණය විසින් ප්‍රතික්ෂේප කරයි.

වැඩබලන පොලිස්පතිවරයා පත්කිරීමට අපොහොසත්වීම සහ ශ්‍රේෂ්ඨාධිකරණයට සහ අභියාචනාධිකරණයට විනිසුරුවරුන් පත් නොකිරීම පදනම් කරගෙන ජනාධිපතිවරණයට තරග කිරීම සඳහා ජනාධිපති රනිල් වික්‍රමසිංහ මහතා නුසුදුස්සකු බව ප්‍රකාශ කරන ලෙස මෙම මූලික අයිතිවාසිකම් පෙත්සම ඉදිරිපත් කර තිබුණි.

ඒ, නීතීඥවරයෙකු වන ශාන් රණසූරිය මහතා විසින්.

ඒ අනුව අද (28) මෙම පෙත්සම විභාගයට ගැනීම ප්‍රතික්ෂේප කළ ශ්‍රේෂ්ඨාධිකරණය නඩු ගාස්තු වශයෙන් රුපියල් 50,000 ක් ගෙවන ලෙසද පෙත්සම්කරුවාට නියෝග කළේය.

නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් නෙරින් පුල්ලේ මහතා පෙත්සම්කරුවන් අධිකරණයට කරුණු සාවද්‍ය ලෙස ඉදිරිපත් කර ඇති බවටත්, අයදුම්පත්‍රය මගින් ආණ්ඩුක්‍රම ව්‍යවස්ථාවේ 92 වැනි වගන්තිය උල්ලංඝනය කර ඇති බවටත් විරෝධතා ඉදිරිපත් කළේය.