රුපියල් දහතුන් දහස් දෙසීයක මුදලක් අල්ලස් වශයෙන් ලබාගත් කම්කරුවෙකු (යන්ත්‍ර ක්‍රියාකරුවෙකු) සහ නඩත්තු කම්කරුවෙකු අත්අඩංගුවට ගෙන තිබෙනවා.
මෙලෙස අත්අඩංගුවට ගෙන ඇත්තේ පොතුවිල් ප්‍රාදේශීය වාරිමාර්ග ඉංජිනේරු කාර්යාලයේ කම්කරුවෙකු සහ අක්කරපත්තුව සහකාර ඉංජිනේරු ඒකක කාර්යාලයේ නඩත්තු කම්කරුවෙකු බවයි අල්ලස් කොමිසම සඳහන් කළේ.
අඩ්ඩාල වන ප්‍රදේශයේ පුද්ගලයෙකු විසින් සිදු කරන ලද පැමිණිල්ලක් මත කොච්චිකච්චේන කුඹුරු යායට යන මාර්ගයේ දී ඊයේ (17) මෙම සැකකරුවන් දෙදෙනා අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගෙන ඇති බවයි වාර්තා වුණේ.
කොච්චිකච්චේන කුඹුරු යායට ජලය සපයන ඇල මාර්ගය සුද්ද කිරීමට පැමිණිලිකරු සභාපතිත්වය දරණ ගොවි සමිතිය මඟින් කරන ලද ඉල්ලීමට අනුව, අක්කරපත්තුව වාරිමාර්ග දෙපාර්තමේන්තුවෙන් ලබා දී ඇති ස්කැවේටර් යන්ත්‍රය සඳහා ගොවි සමිතිය මඟින් ලබාදෙන ඉන්ධන ප්‍රමාණය ප්‍රමාණවත් නොවන බව පවසා, ඒ සඳහා වැඩිපුර ඩීසල් ලීටර් 51ක් වැය වන බවට දන්වා ඒ වෙනුවෙන් රුපියල් දහතුන්දහස් දෙසීයක මුදලක් අල්ලස් වශයෙන් ඉල්ලා එය ලබාගැනීම් දී මොවුන්ව අත්අඩංගුවට ගෙන තිබෙනවා.
අත්අඩංගුවට ගැනුණු සැකකරුවන් අක්කරපත්තුව මහේස්ත්‍රාත් අධිකරණය වෙත ඉදිරිපත් කිරීමට නියමිත බවයි වාර්තා වුණේ.
