ගාසා තීරයේ වැසියන් ඉලක්ක කරගනිමින් ඊශ්‍රායල හමුදාව පූර්ව අනතුරු ඇඟවීමකින් තොරව ගුවන් ප්‍රහාර එල්ල කළහොත් තමන් සන්තකයේ සිටින ප්‍රාණ ඇපකරුවන් මරා දමන බවට හමාස් සංවිධානය අනතුරු අඟවා තිබෙනවා.
මේ අතර පසුගිය දින තුන තුළ යුද ගැටුම් හේතුවෙන් ඊශ්‍රායලයේ මියගිය පුද්ගලයින්ගේ සංඛ්‍යාව 800 ඉක්මවන බව විදෙස් වාර්තා සඳහන් කරනවා.
ගාසා තීරයට ඊශ්‍රායලය එල්ල කළ ගුවන් ප්‍රහාර හේතුවෙන් මියගිය සංඛ්‍යාව 687 දක්වා ඉහළ ගොස් ඇති බව පලස්තීන බලධාරීන් පවසන්නේ.
මේ අතර හමාස් සංවිධානය විසින් අත්පත් කරගත් ගාසා තීරය ආසන්නයේ දකුණු ප්‍රදේශය යළි සිය පාලනයට නතු කර ගැනීමට සමත් වූ බව ඊශ්‍රායල හමුදාව ප්‍රකාශ කළා.
ඊශ්‍රායල ආරක්ෂක අංශ ප්‍රකාශයක් නිකුත් කරමින් කියා සිටියේ ඊයේ රාත්‍රියේ ප්‍රහාරක ජෙට් යානා, හෙලිකොප්ටර් යානා සහ කාලතුවක්කු ගාසා තීරයේ හමාස් සහ ඉස්ලාමීය ජිහාඩ් ත්‍රස්තවාදී ඉලක්ක 500කට අධික සංඛ්‍යාවකට පහර දුන් බවයි.
ඊශ්‍රායල අගමැති බෙන්ජමින් නෙතන්යාහු ගාසා තීරයේ සිවිල් වැසියන්ට අනතුරු අඟවා ඇත්තේ සියලුම හමාස් අඩවිවලින් ඉවත් වන ලෙසයි.
මේ අතර ඊශ්‍රායල සිදුකරනු ලබන හමුදා මෙහෙයුම් “ජාත්‍යන්තර මානුෂීය නීතියට දැඩි ලෙස අනුකූලව සිදු කළ යුතු” බවට. එක්සත් ජාතීන්ගේ මහලේකම් ඇන්ටෝනියෝ ගුටරෙස් සඳහන් කර තිබෙනවා.
