ගෑස් සිලින්ඩරයට ලබාදෙන ඡන්දය මුළුතැන් ගෙට ලබාදෙන ඡන්දයක් සේම රටේ සහ දරුවන්ගේ අනාගත තීරණය කරන ඡන්දයක් බව ජනාධිපති රනිල් වික්රමසිංහ මහතා ප්රකාශ කර තිබෙනවා.
ජනාධිපතිවරයා මේ බව සඳහන් කර සිටියේ නුගේගොඩ – ආනන්ද සමරකෝන් එළිමහන් රංග පීඨයේ ඊයේ (28) පැවති “පුළුවන් ශ්රී ලංකා” විජයග්රාහී මහජන රැලියට එක්වෙමින්.
වැඩිදුරටත් අදහස් දැක්වූ ජනපතිවරයා සඳහන් කළේ “පුළුවන් ශ්රී ලංකා” දේශපාලන වේදිකාව රට බේරා ගැනීමේ වේදිකාවක් බවයි.
එම වේදිකාවෙන් පිට සිටින්නේ ජනතාව මියගියත් දේශපාලන වාසි ලබාගත යුතු බව සිතූ දේශපාලනඥයන් බවත් හෙතෙම මෙහිදී ප්රකාශ කළා.
එළැඹෙන ජනාධිපතිවරණයේ දී රනිල් වික්රමසිංහ මහතාගේ විජයග්රහණය තහවුරු කිරීම වෙනුවෙන් සංවිධානය කර තිබූ මෙම ජන රැලියට අති විශාල ජනතාවක් එක්ව සිටියා.
එදා ජනතාව පිළිබඳ නොසිතු සහ විසඳුමක් නොතිබූ නායකයන් අද තමාව රටේ ජනාධිපතිවරයා ලෙස පත් කර ගන්නා මෙන් ජනතාවගෙන් ඉල්ලා සිටින්නේ කෙසේදැයි මෙහිදී ප්රශ්න කළ ජනාධිපතිවරයා නැවතත් රටේ මෙවන් අසීරුතාවක් ඇති වුවහොත් සජිත් සහ අනුර පලා යනු ඇති බවත් සඳහන් කර සිටි බවයි පුළුවන් ශ්රී ලංකා මාධ්ය අංශය නිකුත් කළ නිවේදනයේ දැක්වෙන්නේ.
මෙම අවස්ථාවට අමාත්ය ආචාර්ය සුසිල් ප්රේමජයන්ත, අමාත්ය ආචාර්ය බන්දුල ගුණවර්ධන, පාර්ලිමේන්තු මන්ත්රී මේජර් ප්රදීප් උදුගොඩ, හිටපු අමාත්ය ෆයිසර් මුස්තාෆා, හිටපු අමාත්ය රවී කරුණානායක, ඇතුළු මහත්ම මාහත්මීන් රැසක් එක්ව සිටියා.
