ජාතික ජන බලවේගය දිනූ ඉතිහාසගත විජයග්‍රහණය වෙනුවෙන් විපක්ෂ නායක සජිත් ප්‍රේමදාස මහතා විසින් උණුසුම් සුබ පැතුම් පිරිනමා තිබෙනවා.
නිවේදනයක් නිකුත් කරමින් විපක්ෂ නායකවරයා සඳහන් කරන්නේ ශ්‍රී ලංකා ප්‍රජාතාන්ත්‍රික සමාජවාදී ජනරජයේ 10 වැනි පාර්ලිමේන්තුව සඳහා මහජන නියෝජිතයින් තෝරා පත්කර ගැනීම වෙනුවෙන් පැවති මහ මැතිවරණයේ දී බහුතර ආසන දිනූ ජනාධිපති අනුර කුමාර දිසානායක මහතාගේ නායකත්වයෙන් යුත් ජාතික ජන බලවේගයට සිය අවංක සුබ පැතුම් එක් කරන බවයි.
ශ්‍රී ලාංකීය ජනතාව බලාපොරොත්තු වන යහපත් රාජ්‍ය පාලනයක් සඳහාත් ජනතාවගේ සිතුම් පැතුම් ඉටුවන දේශයක් ගොඩනැගීම සඳහාත් අවශ්‍ය ශක්තිය වත්මන් පාලනය නොඅඩුව ලැබී ඇති බව ද විපක්ෂ නායකවරයාගේ නිවේදනයේ සඳහන්.
එතුළින් රටක් ලෙස අප මේ මොහොතේ මුහුණ දී සිටින දුෂ්කරතා ජය ගැනීමේ හැකියාව වත්මන් පාලනයට උදාවනු ඇති අතර ජාතික ජන බලවේග ආණ්ඩුවක් යටතේ මෙරට ජනතාවට ලබාදුන් පොරොන්දු මත පිහිටා සිය ප්‍රතිපත්ති හා වැඩපිළිවෙළ තම ධුර කාලය තුළ සාර්ථක ව ඉටු කිරීම තමන් සතු අභියෝගය ලෙස ඔවුන් වටහාගෙන ඇති බව සිය විශ්වාසය බව විපක්ෂ නායක ප්‍රමුඛ සමගි ජන බලවේගය නිවේදනය කර සිටිනවා.
එමෙන්ම තීරණාත්මක මැතිවරණයේ දී සමගි ජන බලවේගය වෙනුවෙන් ඡන්ද 1,968,716ක් දිනා දී ආසන 40කට අවස්ථාව දුන් රටේ ජනතාවටත් පක්ෂයේ දියුණුවට නන් අයුරින් උපකාර කළ සැමට සිය ගෞරවය ස්තුතිය හෘදයාංගම පුද කරන බවයි විපක්ෂ නායකවරයා පවසන්නේ.
විපක්ෂ නායක සජිත් ප්‍රේමදාස මහතා නිකුත් කළ සම්පූර්ණ නිවේදනය මෙතැනින්..
