පසුගිය වසරේ පෙබරවාරි මස 19 වන දින කොළඹ අංක 05, මහේස්ත්රාත් අධිකරණයේ දී නීතිඥවරයෙක් ලෙස පෙනී සිටි පුද්ගලයෙක් විසින් අධිකරණ ශාලාවට ඇතුලු වී එම අධිකරණයේ නඩුවක් සඳහා බන්ධනාගාරය මගින් ඉදිරිපත් කර සිටි සංජීව කුමාර සමරරත්න නොහොත් ගණේමුල්ල සංජීව නැමැති අයට වෙඩි තබා ඝාතනය කිරීමේ අපරාධය සම්බන්ධයෙන් කොළඹ දිසා අපරාධ කොට්ඨාසය විසින් විමර්ශනට අදාළව ඔස්මන්ඩ් ගුණසේකර හෙවත් ‘ගම්පහ ඔස්මන්ඩ්’ නැමති ගම්පහ ප්රදේශයේ පදිංචිකරුවෙක් අතදන්ගුවට් ගෙන තිබෙනවා.
මෙම අපරාධයට අදාලව අත්අඩංගුවට ගෙන රැඳවුම් නියෝග මත සිටින සැකකරුවන්ගෙන් අනාවරණය වූ තොරතුරු අනුව මෙම අපරාධය සඳහා විදේශ ගතව සිටින සංවිධානාත්මක අපරාධකරුවන් සමඟ එක්ව සැලසුම් කිරීම, කුමන්ත්රණය කිරීම හා අපරාධය සිදු කිරීම සඳහා අවශ්ය ගිනි අවිය ලබා දී මනුෂ්ය ඝාතනයට ආධාර අනුබල දීම හා බලපත්රයක් නොමැතිව විදේශ රටක නිෂ්පාදිත රිපීටර් වර්ගයේ ගිනි අවියක්, එම ජීව පතරොම් 10 ක් හා පතරොම් ගැබ් 02 ක් සන්තකයේ තබා ගැනීම සම්බන්ධයෙන් සැකපිට මොහුව පොලිසිය විසින් අත්අඩංගුවට ගෙන තිබෙනවා.
ඊයේ (13) රාත්රී ගම්පහ පොලිස් වසමේ ශ්රී බෝධි පාර ප්රදේශයේදී සැකකරුව අත්අඩංගුවට ගත් බවයි පොලිසිය සඳහන් කළේ.
සැකකරු අවුරුදු 69 ක් වන ගම්පහ ප්රදේශයේ පදිංචිකරුවෙක්.
කොළඹ දිසා අපරාධ කොට්ඨාසය වැඩිදුර විමර්ශන කටයුතු සිදු කරනු ලබනවා.
