කොරෝනා වෛරසය ආසාදනය වී සුව විමෙන් පසු නිවෙස්වලට ගොස් සිටි සිව් දරු මවකට හා එක් දරු පියෙකුට නැවත කොරෝනා වෛරසය ආසාදනය වී කොවිඩ් නිව්මෝනියාවෙන් මිය ගොස් ඇති බැව් ගාල්ල කරාපිටිය ශික්ෂණ රෝහලේ පැවති පශ්චාත් මරණ පරික්ෂණයකදි අනාවරණය විය.
මියගොස් ඇත්තේ හික්කඩුව වවුලගොඩ පදිංචි 73 හැවිරිදි වියේ පසුවන සිව් දරු මවක් හා බුස්ස ප්‍රදේශයේ පදිංචි 59 හැවිරිදිවියේ පසුවන එක් දරු පියෙකි.
සිව්දරු මව කොරෝනා වෛරසය ආසාදනය විමෙන් පසු ගාල්ල කරාපිටිය ශික්ෂණ රෝහලේ කොරෝනා රෝගින් සදහා වෙන්කොට ඇති වාට්ටුවේ ප්‍රථිකාර ලබමින් සිට මැයි 20 වැනි දින සුව වි නිවසට ගොස් ඇත.
ඇයගේ පවුලේ සාමාජිකයින් ද නිරෝධායනයට ලක්කොට ඇත.මෙකි මව නිවසේ සිටියදි හුස්ම ගැනිමට අපහසුවි ඇති අතර නිවැසියන් විසින් 1990 හදිසි ගිලන් රථ සේවාවට දැනුම් දි ඇත.
ගිලන් රථය පැමිණෙන විට මව නිවස තුලදි මියගොස් ඇති බැව් හදිසි මරණ පරික්ෂණයේ දි අනාවරණය විය.
බුස්ස ප්‍රදේශයේ පදිංචි එක් දරුපියා කොරෝනා වෛරසය ආසාදනය වි වළහන්දුව කොරෝනා වෛද්‍ය ප්‍රථිකාර මධ්‍යස්ථානයේ ප්‍රථිකාර ලබාගෙන ඇත.
ඔහු 28 වැනි දින එම වෛද්‍ය ප්‍රථිකාර මධ්‍යස්ථානයේ සිට සුවය ලබා නිවසට ගොස් ඇති අතර දින 03කට පමණ පසු හුස්ම ගැනිමට අපහසුවිමෙන් නිවස තුලදි මියගොස් ඇත.
මිය ගිය සිව් දරු මවගේ හා එක් දරු පියාගේ හදිසි මරණ පරික්ෂණය රත්ගම හදිසි මරණ පරික්ෂක වයි.එම් සාගරිකා නිල්මිණි මහත්මිය විසින් සිදු කරනු ලැබිය.
පශ්චාත් මරණ පරික්ෂණය සහකාර අධිකරණ වෛද්‍ය නිලධාරි සමාධිදන්දෙණිය ආරච්චි මහත්මිය විසින් සිදු කළාය.
ඉදිරිපත් වු සාක්ෂි හා වෛද්‍ය වාර්තා සැලකිල්ලට ගත් මරණ පරික්ෂකවරිය කොවිඩ් නිව්මෝනියාවෙන් මෙකි මරණ වි ඇති බවට තින්දු කළාය.
(ගාල්ල – ලලිත් චාමින්ද)
