කොල්කටාහි පැවති ප්‍රසංගයකින් අනතුරුව හෝටල් කාමරයක් තුළ අභිරහස් ලෙස මියගිය ජනප්‍රිය ඉන්දීය ගායන ශිල්පී ක්‍රිෂ්ණ කුමාර් කුන්නත්ගේ මරණය සම්බන්ධයෙන් තොරතුරු රැසක් මේ වනවිට අනාවරණය වී ඇති බව ඉන්දීය මාධ්‍ය වාර්තා කරනවා.
ඒ, අනුව ඉන්දීය ආරක්ෂක අංශ කේ.කේ. ගේ මරණය ස්වාභාවික නොවන මරණයක් ලෙස සටහන් කරමින් ඒ සම්බන්ධයෙන් තව දුරටත් විමර්ශන කටයුතු සිදුකරමින් සිටින බවයි වාර්තා වන්නේ.
කෙසේ වෙතත් පශ්චාත් මරණ පරීක්ෂණයෙන් අනාවරණය කළේ හෘදය ආශ්‍රිතව හටගත් අසනීප තත්ත්වයක් හේතුවෙන් මෙම මරණය සිදු බවත්, ඔහුගේ මුහුණේ තුවාල කිහිපයක් ද දක්නට තිබූ බවයි.
කේ.කේ. අවසන් වරට සහභාගී වූ කොල්කටා නුවර පැවති ප්‍රසංගය සඳහා ප්‍රසංගය පැවති පරිශ්‍රයේ රැඳවිය හැකි ධාරිතාවට වඩා වැඩි ප්‍රේක්ෂක පිරිසක් පැමිණ සිට ඇති බවයි අනාවරණය වී ඇත්තේ.
ප්‍රසංගය අතර තුර අවස්ථා කිහිපයකදී කේ.කේ. මුහුණ පිසදමමින් වේදිකාවේ රැඳී සිටින ආකාරය දක්නට ලැබුණු අතර, එහිදී ඔහු සංවිධායකයින්ට එහි වායු සමීකරණ පද්ධතිය නිසි ආකාරයෙන් ක්‍රියා නොකරන බව ද පවසා ඇති බව සඳහන්.
කෙසේ වෙතත් ඔහු විඩාබර මුහුණකින් යුතුව ප්‍රසංගය පැවති ස්ථානයෙන් නික්ම ඔහු නවාතැන් ගෙන සිටි හෝටලයට පැමිණ තිබෙනවා.
පසුව කළ සොයා බැලීමක දී ඔහු සිය හෝටල් කාමරය තුළ බිම ඇදවැටී සිටියදී සොයාගත් අතර ඒ වනවිටත් ඔහු ජීවිතක්ෂයට පත්ව සිටි බවයි වාර්තා වන්නේ.
