2015 වසරේ පැවති ජනාධිපතිවරණ සමයේ ස.තො.ස ආයතනය මගින් කැරම් බෝඩ් හා දාම් ලෑලි මිල දී ගෙන ඒවා ක්‍රීඩා සංගම් අතර බෙදාහැරීම තුළින් රජයට රුපියල් මිලියන 53කට ආසන්න පාඩුවක් සිදු කළේ යැයි චෝදනා ලබා සිටින හිටපු ක්‍රීඩා අමාත්‍ය මහින්දානන්ද අලුත්ගමගේ සහ වත්මන් වෙළඳ අමාත්‍ය නලින් ප්‍රනාන්දු යන මහත්වරුන්ට එරෙහි නඩුවේ විත්තිවාචකය කැඳවීමට කොළඹ ත්‍රිපුද්ගල මහාධිකරණ විනිසුරු මඩුල්ල තීන්දු කළා.
මෙම නඩුවේ විත්තිවාචකය කැඳවීමකින් තොරව විත්තිකරුවන් නිදහස් කරන්නේ ද ?නැත්නම් විත්තිවාචකය කැඳවනවා ද යන නියෝගය ප්‍රකාශ කරමින් අමල් රණරාජා ප්‍රමුඛ ත්‍රිපුද්ගල විනිසුරු මඩුල්ලක් විසින් මෙම නියෝගය ප්‍රකාශයට පත් කළා.
ඉන් අනතුරුව විත්තිවාච්චිකය ඉදිරිපත් කිරීම අගෝස්තු මස 23 වනදා සිදු කරන ලෙසත් විනිසුරු මඩුල්ල විත්ති පාර්ශ්වයට නියෝග කළා.
2015 වසරේ පැවති ජනාධිපතිවරණය සමයේ ක්‍රීඩා සංගම් අතර බෙදා දීම සඳහා සතොස ආයතනය හරහා කැරම්බෝඩ් 14000 ක් සහ දාම් ලෑලි 11000 ක් මිල දී ගැනීම තුළින් රජයට රුපියල් මිලියන 53කට ආසන්න පාඩුවක් සිදු කළේ චෝදනා කොට අල්ලස් කොමිසම විසින් මෙම විත්තිකරුවන්ට එරෙහිව කොළඹ මහාධිකරණය හමුවේ මෙම අධි චෝදනා පත්‍ර ගොනුකර තිබුණා.
