ශ්රී ලංකා ක්රිකට් ආයතනය සමඟ ගිවිසුම්වලට එළඹ සිටින ජාතික තලයේ ක්රිකට් ක්රීඩකයින් එම ආයතනයේ සේවකයින් සේ සලකා රඳවා ගැනීමේ බදු අය කිරීමට දේශීය ආදායම් දෙපාර්තමේන්තුව ගෙන තිබෙන තීරණයට එරෙහිව ක්රිකට් ක්රීඩකයන් විසින් ගොනුකර තිබෙන පෙත්සමට අදාළව අභියාචනාධිකරණය හමුවේ සමථයකට පත්ව තිබෙනවා.
ශ්රී ලංකා එක්දින ක්රිකට් කණ්ඩායමේ නායක චරිත් අසලංක සහ ටෙස්ට් ක්රිකට් කණ්ඩායමේ නායක ධනංජය ද සිල්වා විසින් මෙම පෙත්සම් ඉදිරිපත් කර තිබුණා.
එම පෙත්සම් අද (03) අභියාචනාධිකරණ සභාපති විනිසුරු මොහොමඩ් ලෆාර් තාහීර් සහ ප්රියන්ත ප්රනාන්දු යන අභියාචනාධිකරණ විනිසුරු මඩුල්ල ඉදිරියේ කැඳවනු ලැබුවා.
එහිදී වගඋත්තරකාර දේශීය ආදායම් දෙපාර්තමේන්තුව විසින් ඉදිරිපත් කළ සමථ යෝජනාවලට පෙත්සම්පකාර පාර්ශ්වයේ එකඟතාවය පළකර තිබෙනවා.
ඒ, අනුව ශ්රී ලංකා ක්රිකට් ආයතනය විසින් ක්රිකට් ක්රීඩකයින්ට ගෙවිය යුතු ගෙවීම් සිදුකිරීමට එකඟතාවය පළ වූ අතර, ඉන් අය වියයුතු රඳවා ගැනීමේ බද්ද ජූනි මාසයේ සිට දේශීය ආදායම් දෙපාර්තමේන්තුවට යැවීමට ද එකඟතාවයක් ඇති වුණා.
යම් හෙයකින් මෙම නඩුකරයෙන් පෙත්සම්කාර ක්රීඩකයින්ට වාසිදායක තීන්දුවක් ලැබුණහොත් මෙසේ අය කරගනු ලබන රඳවා ගැනීමේ බදු ආපසු ගෙවීමටත් එකගතාවයක් ඇතිව තිබෙනවා.
ඊට අමතරව තවත් කරුණු කිහිපයක් සම්බන්ධයෙන් ද පාර්ශ්වකරුවන් අතර සමථයක් ඇතිවී තිබෙනවා.
මෙම සමථයට පෙත්සම්කරුවන් වෙනුවෙන් පෙනී සිටි නීතිඥ නිශාන් ප්රේමතිරත්න එකඟතාවය පළ කළ අතර, ශ්රී ලංකා ක්රිකට් ආයතනය වෙනුවෙන් පෙනී සිටි ජනාධිපති නීතිඥ කුවේර ද සොයිසා ද එකඟත්වය පළ කර සිටියා.
ඉන් අනතුරුව පෙත්සමට අදාළ විරෝධතා තිබේ නම් ඒවා අගෝස්තු මස 29 වනදාට පෙර ගොනු කරන ලෙසත්, ප්රතිවිරෝධතා ඇත්නම් ඒවා සැප්තැම්බර් මස 29 වනදාට පෙර ගොනු කරන ලෙසත් අධිකරණය විසින් පාර්ශ්වකරුවන්ට නියෝග කරනු ලැබුවා.
ඉන් අනතුරුව පෙත්සම් විභාගය නොවැම්බර් මස 06 වැනිදා පැවැත්වීමට ද දින නියම කෙරුණා.
wpDiscuz
