වැලිමඩ සිට මීගමුව බලා ධාවනය වූ දිවුලපිටිය ඩිපෝවට අයත් ලංගම බස් රථයක රියදුරු නුවරඑළිය පොලිසිය මඟින් අද (03) පෙරවරුවේ අත්අඩංගුවට ගෙන තිබෙනවා.
නුවරඑළිය – වැලිමඩ මාර්ගයේ සීතාඑළිය ප්‍රදේශයේ රථවාහන රාජකාරියේ නිරතව සිටි පොලිස් නිලධාරීන් විසින් බස් රථය නවත්වා සිදුකළ පරීක්ෂා කිරීමේ දී තහවුරු වී ඇත්තේ එහි රියදුරා අධික ලෙස බීමත්ව සිටින බවටයි.
අනතුරුව නුවරඑළිය පොලිසියේ නිලධාරියෙක් විසින් මගීන් සමඟ බස් රථය නුවරඑළිය නගරය වෙත රැගෙනවිත් පරීක්ෂා කිරිමේ දී, බස් රථයේ රියදුරු අසුන පිටුපස තිබී නීතිවිරෝධි මත්පැන් (කසිප්පු) සහිත කෑන් එකක් සොයාගැනීමටයි හැකිව ඇත්තේ.
අනතුරුව රියදුරා නුවරඑළිය පොලිසිය මඟින් අත්අඩංගුවට ගෙන ඇති අතර, ඔහු බස් රථය ධාවනය කරන අවස්ථාවේ වතුර පානය කරන මුවාවෙන් විටින් විට කසිප්පු පානය කරමින් රථය ධාවනය කර ඇති බවයි පොලිසිය සැකපළ කරන්නේ.
මෙම අවස්ථවේ බස් රථය තුළ මගීන් 70කට ආසන්න සංඛ්‍යාවක් සිට ඇති බව පොලිසිය සඳහන් කළා.
අත්අඩංගුවට ගත් බස් රථයේ රියදුරා නුවරඑළිය මහේස්ත්‍රාත් අධිකරණය වෙත ඉදිරිපත් කිරීමට නියමිතයි.
මේ අතර නුවරඑළිය ලංගම ඩිපෝවේ රියදුරෙකු යොදවා බස් රථය මීගමුව බලා පිටත්කර එවීමට නුවරඑළිය පොලිසිය කටයුතු කර තිබෙනවා.
