රුපියල් එක් කෝටි අනූ ලක්ෂයක් වටිනා කුෂ් මත්ද්‍රව්‍ය තොගයක් තමන් පැළඳ සිටින කබාය (Jacket) තුළ සඟවා ගෙන, ව්‍යාපාරිකයන් සඳහා වූ
රක්ත මාවත ( Red Channel ) ඔස්සේ කටුනායක ගුවන් තොටුපොළෙන් පිටකර ගෙන යාමට තැත් කළ, ශ්‍රී ලාංකික ගුවන් මගියෙකු අද (03) උදෑසන ගුවන් තොටුපොළ රේගු නිලධාරීන් විසින් අත්අඩංගුවට ගනු ලැබුවා.
මරදාන, සංඝරාජ මාවත ප්‍රදේශයේ පදිංචි 48 හැවිරිදි සැකකරුවෙක් මෙලෙස අත් අඩංගුවට ගැනුණු බවයි දසත ගුවන්තොටුපොළ වාර්තාකරු පැවසුවේ.
සැකකරු අද උදෑසන 09.45 ට තායිලන්තයේ බැංකොක් නුවර සිට ශ්‍රී ලන්කන් ගුවන් සේවයේ යූ.එල්.- 403 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණා.
ඔහු විසින් රැගෙන ආ පාවහන් තොගය රේගු නිලධාරීන් විසින් නිශ්කාෂණය කරමින් සිටියදී , ඔහු එතෙක් පැළඳගෙන සිටි කබාය ගලවා පසෙක වූ පුටුවක දමා ඇති බවයි වාර්තා වන්නේ.
මේ පිළිබද සැක සිතූ රේගු නිලධාරීවරයා, නිශ්කාෂණ කටයුතු පසෙක තබා මෙම ව්‍යාපාරිකයා ගලවා දැමූ කබාය ගෙන පරීක්ෂා කරන විට , ඒ තුළ සඟවාගෙන තිබූ කිලෝග්‍රෑම් 01යි ග්‍රෑම් 847ක් බර මෙම කුෂ් මත්ද්‍රව්‍ය තොගය අත්අඩංගුවට ගැනීමට හැකි වුණා.
සැකකරු හා කුෂ් තොගය කටුනායක ගුවන් තොටුපොළ පොලිස් මත්ද්‍රව්‍ය කාර්යාංශයේ නිලධාරීන් වෙත භාර දීමට නියමිතයි.
