ජාඇල ඔතේ කැලේ දී නීතිවිරෝධි මත්පැන් ස්කාගාරයක් වටලා දීර්ඝ කාලයක සිට මහා පරිමාණයෙන් නීති විරෝධී මත්පැන් ජාවාරමේ යෙදී සිටි පුද්ගලයන් දෙදෙනෙකු පොලිස් විශේෂ කාර්ය බලකාය ගෝනහේන කඳවුරේ නිලධාරීන් අත්අඩංගුවට ගෙන තිබෙනවා.
ඊයේ (18) පස්වරුවේ මෙම වැටලීම ජා ඇල – ඒකල මාර්ගයේ දුම් රිය හරස් මාර්ගය අසලදියි සිදු කෙරුණේ.
එහි දී නීති විරෝධී මත්පැන් ලීටර් 270ක් සන්තකයේ තබාගෙන මෝටර් රථයකින් ප්‍රවාහනය කරමින් සිටි උස්වැටකෙයියාව ප්‍රදේශයේ පදිංචි වයස අවුරුදු 30 පුද්ගලයකු අත්අඩංගුවට ගැනුණා.
සැකකරුගෙන් සිදු කළ වැඩිදුර ප්‍රශ්න කිරීමේ දී හෙළි වූයේ මහා පරිමාණයෙන් ඔතේ කැලේ ප්‍රදේශයේ නීතිවිරෝධී මත්පැන් නිෂ්පාදනය කරන ස්ථානයක් පවත්වාගෙන යන බවයි.
පසුව එම ස්ථානයට ගිය විශේෂ කාර්‍යය බලකායේ නිලධාරීන් විසින් අදාළ ස්ථානය වටලා නීති විරෝධී මත්පැන් ලීටර් 742.5 ක් සමග ජාඇල ප්‍රදේශයේ පදිංචි වයස අවුරුදු 24 ක තවත් සැකකරුවෙකු ද අත් අඩංගුවට ගැනුණා.
සැකකරුවන් සම්බන්ධයෙන් ඉදිරි නීතිමය ක්‍රියාමාර්ග ගැනීම සඳහා ඔවුන් ව ජා ඇල පොලිසියට භාර දී තිබෙනවා.
