පක්ෂ මාරුකරමින් එහාට මෙහාට පනින පුද්ගලයින්ට සිදුවන දේ මැතිවරණයක දී තේරුම් ගැනීමට හැකිවනු ඇති බව හිටපු ජනාධිපති මෛත්‍රීපාල සිරිසේන පවසනවා.
ශ්‍රී ලංකා නිදහස් පක්ෂයේ සාමාජිකත්වය දරණ පාර්ලිමේන්තු මන්ත්‍රී ශාන් විජයලාල් ද සිල්වා සමඟි ජන බලවේගයට සහාය පළ කිරීමට ගත් තීරණය සම්බන්ධයෙන් පොළොන්නරුව ප්‍රදේශයේ දී මාධ්‍යවේදීන් විමසූ අවස්ථාවේ දී හිටපු ජනාධිපතිවරයා මේ බව සඳහන් කළා.
පිල් මාරුකරන පුද්ගලයින්ට ජනතාව විසින් තීන්දුව ලබාදෙනු ඇති බවයි ඔහු මෙහිදී වැඩිදුරටත් සඳහන් කර සිටියේ.
දකුණු පළාතේ හිටපු මහ ඇමතිවරයා ලෙස කටයුතු කළ, පාර්ලිමේන්තු මන්ත්‍රී ශාන් විජයලාල් ද සිල්වා සමගි ජන බලවේගය සමඟ එක්වීම ද සිදු වුණා.
අද (01) දිනයේ විපක්ෂ නායක සජිත් ප්‍රේමදාස හමු වූ ශාන් විජයලාල් ද සිල්වා, සමගි ජන බලවේගය හා එක්ව ඇති අතර එහිදී ඔහුට සමගි ජන බලවේගයේ අම්බලන්ගොඩ ප්‍රධාන සංවිධායක තනතුර ද ලබාදෙනු ලැබුවා.
ශ්‍රී ලංකා නිදහස් පක්ෂයේ සාමාජිකයෙකු වන ශාන් විජයලාල් ද සිල්වා පසුගියවර පොදුජන පෙරමුණ නියෝජනය කරමින් පාර්ලිමේන්තුවට පිවිසියා.
