ගොඩබිම් හමුදාව ගාසා තීරයේ හමාස් සංවිධානය ඉලක්ක කර ගනිමින් මෙහෙයුම් පුළුල් කරන බව ඊශ්‍රායලය පවසනවා.
මේ අතර ඊශ්‍රායල ප්‍රහාර හමුවේ දැවැන්ත පිපිරීම් ද ගසා තීරයේ ඇතැම් ප්‍රදේශවල දැකගත හැකි බව විදෙස් මාධ්‍ය සඳහන් කරනවා.
මෙම යුද ගැටුම් හේතුවෙන් මේ වනවිට පලස්තීනුවන් 7,326ක් මිය ගොස් ඇති අතර, ඊශ්‍රායලයට එල්ල වූ හමාස් ප්‍රහාරයෙන් 1400කට වැඩි පිරිසක් මිය ගියා.
මේ අතර හමාස් හමුදා අංශය වන ‘අල් කසාම්’ බළකාය පවසා ඇත්තේ ගාසා තීරයේ උතුරු කොටසේ ඊශ්‍රායල හමුදාවේ භූමි ආක්‍රමණයකට මුහුණ දෙමින් සිටින බවයි.
පලස්තීන භූමියට ඊශ්‍රායලය විසින් එල්ල කරන ලද බෝම්බ ප්‍රහාරයකින් පසු ඊශ්‍රායලයට රොකට් ප්‍රහාර එල්ල කළ බව ද හමාස් සංවිධානය ප්‍රකාශ කර සිටියා.
එමෙන්ම ඊශ්‍රායලය ගාසා තීරය හරහා සන්නිවේදන සහ අන්තර්ජාල සබඳතා අත්හිටුවා ඇති බව ද හමාස් සංවිධානය පවසනවා.
මේ අතර එක්සත් ජාතීන්ගේ ප්‍රධානියා අනතුරු ඇඟවා ඇත්තේ ආහාර, ජලය සහ බලශක්තිය නොමැතිකම හේතුවෙන් ගාසා තීරය “පෙර නොවූ විරූ මානව දුක්ඛිත අවපාතයකට” මුහුණ දෙන බවයි.
“මානුෂීය සටන් විරාමයක්, සියලු ප්‍රාණ ඇපකරුවන් කොන්දේසි විරහිතව නිදහස් කිරීම සහ ජීවිතාරක්ෂක සැපයුම් ලබාදීම සඳහා වන මගේ ඉල්ලීම මම නැවත නැවතත් කියමි,” එක්සත් ජාතීන්ගේ මහලේකම් ඇන්ටෝනියෝ ගුටරෙස් නිවේදනයක් නිකුත් කරමින් කියා සිටියා.
