පාතාල කල්ලි සාමාජිකයකුවූ ගනේමුල්ල සංජීව නමැත්තා ඝාතනය කිරීමට අදාළ ගිනි අවිය අධිකරණය තුළට රැගෙන ආ බව කියන මේ වන විට සැඟව සිටින ඉෂාරා සෙව්වන්දි නමැති දෙවන සැකකාරියගේ මව හා බාල සොහොයුරා මාර්තු මස 7 දින දක්වා රක්ෂිත බන්ධනාගාර ගත කරන ලෙස කොළඹ අතිරේක මහේස්ත්‍රාත් ප්‍රසාන් අමරසේන මහතා අද (26) නියෝග කළා.
අදාළ සැකකාරිය හා සැකකරුවා කොළඹ අපරාධ කොට්ඨාසයේ පැය 24 ක් රඳවා තබාගෙන ප්‍රශ්න කර අද අධිකරණයට ඉදිරිපත් කිරීමෙන් අනතුරුව එසේ රක්ෂිත බන්ධනාගාර ගත කිරීමට නියම කෙරුණු බවයි පැවසෙන්නේ.
සිද්ධිය සම්බන්ධයෙන් අදාළ සැකකරුවන්ගෙන් ප්‍රශ්න කර තොරතුරු ලබාගත් බවත් එහි ප්‍රගති වාර්තාවක් ඉදිරි නඩු වාරයේදී අධිකරණයට ඉදිරිපත් කිරීමට බලාපොරොත්තු වන බැවින් අත්අඩංගුවට ගෙන ඇති සැකකාරිය හා සැකකරුවා ලබන මස 7 දින දක්වා රක්ෂිත බන්ධනාගාර ගත කරන ලෙස කොළඹ අපරාධ කොට්ඨාසය කරන ලද ඉල්ලීමක් සලකා බලමින් අධිකරණයෙන් එසේ නියම වුණා.
ගනේමුල්ල සංජීව නමැත්තාගේ ඝාතනයෙන් පසුව මේ වන විට සැඟව සිටින ඉෂාරා සෙව්වන්දි නමැති සැකකාරියගේ මව වන 48 හැවිරිදි සේසත්පුර දේවගේ සමන්ති නැමැත්තිය හා සැකකාර සෙව්වන්දි නැමැත්තියගේ බාල සොහොයුරෙකු වන මීගමුව කටුවා ඇල්ලේගම ප්‍රදේශයේ පදිංචි 23 හැවිරිදි පින්පුර දේවගේ චාමික තිවංක වීරසිංහ නමැති දෙදෙනෙකු එසේ රක්ෂිත බන්ධනාගාර ගත කිරීමට නියම කළා.
අදාළ සැකකාරිය හා සැකකරු කොළඹ අපරාධ කොට්ඨාසය විසින් ඊයේ (25) කොළඹ ප්‍රධාන මහෙස්ත්‍රාත් තනූජා ලක්මාලි මහත්මිය වෙත ඉදිරිපත් කිරීමෙන් අනතුරුව ඔවුන් පැය 24 ක් රඳවා තබාගෙන ප්‍රශ්න කිරීමට කොළඹ අපරාධ කොට්ඨාසයට අවසර ලබා දී තිබුණා.
ගනේමුල්ල සංජීව නමැත්තා ඝාතනය කරන බව දැන සිටියදීත් ඒ සම්බන්ධයෙන් තොරතුරු වසන් කර එම සිද්ධියට අනුබලදීමේ චෝදනාව යටතේ කොළඹ අපරාධ කොට්ඨාසය මගින් ඉකුත් 24 දා එම සැකකරුවන් දෙදෙනා අත්අඩංගුවට ගෙන ඇති බව පොලිසිය අධිකරණයට හමුවේ කරුණු දක්වමින් පැවසුවා.
විමර්ශන නිලධාරීන් අධිකරණයට දැක්වූ කරුණු සලකා බැලූ අතිරේක මහේස්ත්‍රාත්වරයා මෙම සිද්ධියේ දෙවන සැකකාරිය වන ඉෂාරා සෙව්වන්දි නමැත්තියගේ මව හා බාල සොහොයුරා මාර්තු මස 7 දින දක්වා එසේ රක්ෂිත බන්ධනාගාරගත කිරීමට නියම කළා.
