ඉන්ධන ඇනවුම් කිරීමේ කටයුතුවලින් අද (28) මධ්යම රාත්රියේ සිට ඉවත් වන බවට තෙල් බෙදුම්කරුවන්ගේ සංගමය තීරණය කිරීමත් සමඟ ඉන්ධන පිරවුම්හල් අසල දිගු පෝලිම් පවතින බව අප වාර්තාකරුවන් පවසනවා.
ඇතැම් ඉන්ධන අලෙවිසැල් තොග අවසන්වීමෙන් පසු වසා දමා ඇති බවට ද තොරතුරු වාර්තා වනවා.
ඉන්ධන බෙදුම්කරුවන්ට ලැබෙන 3%ක වට්ටම අහෝසි කිරීමට තෙල් සංස්ථාව තීරණය කිරීමත් සමඟ ඉන්ධන ඇනවුම් කිරීමේ කටයුතුවලින් ඉවත් වන බව තෙල් බෙදුම්කරුවන් අද (28) පස්වරුවේ තීරණය කළා.
මේ අතර රට තුළ කිසිඳු ඉන්ධන හිඟයක් නොමැති බව ඛනිජ තෙල් නීතිගත සංස්ථාවේ සභාපති ඩී.ජේ.ඒ.එස්. ද එස්. රාජකරුණා සඳහන් කරනවා.
එමෙන්ම පිරවුම්හල් හිමියන් ඉන්ධන ඇනවුම් කිරීම නතර කරන බවට දැනුම් දීමක් ද සිදුකර නොමැති බව සභාපතිවරයා වැඩිදුරටත් පවසනවා.
