එක්දින ලෝක කුසලාන තරගාවලියේ තීරණාත්මක තරගයක්වන ඉන්දියාව සහ පාකිස්ථාන අතර තරගය මේ වනවිට අහමදාබාද් හී නරේන්ද්‍ර මෝදි ක්‍රීඩාංගණයේ දී පැවැත්වෙනවා.
මෙම තරගය නැරඹීමට ඉන්දීය ප්‍රේක්ෂකයින් බහුතරයක් පැමිණ ඇති අතර, පාකිස්ථාන ප්‍රේක්ෂකයින් එතරම් ක්‍රීඩාංගණයේ දැකගැනීමට ලැබෙන්නේ නැහැ.
ඒ, ලෝක කුසලාන තරගාවලිය වෙනුවෙන් ඉන්දියාවට පැමිණීම සඳහා වීසා ලබාගැනීමට ඔවුන්ට අවස්ථාවක් නොලැබීම හේතුවෙන්.
මේ අතර අද තරගය නැරඹීමට නරේන්ද්‍ර මෝදි ක්‍රීඩාංගණයට පැමිණ සිටින ඉන්දීය ක්‍රීඩා ලෝලීන්ට, ඉන්දීය හිටපු ක්‍රිකට් ක්‍රීඩක ගෞතම් ගාම්භීර් විශේෂ පණිවිඩයක් ලබා දුන්නා.
කාසියේ වාසියෙන් පසු ස්ටාර් ස්පෝර්ට්ස් වෙත අදහස් දක්වමින්, ලෝක කුසලානයට සහභාගී වීමට පැමිණ සිටින පාකිස්ථාන කණ්ඩායම අපහසුතාවයට පත් නොකරන ලෙසත් අගෞරව නොකරන ලෙසත් ගාම්භීර් ඉන්දීය ක්‍රීඩාලෝලීන්ට දැනුම් දුන්නා.
“ඔබේ කණ්ඩායමට සහාය වන්න, නමුත් ඔබේ අමුත්තන් සමඟ නොහොබිනා ලෙස හැසිරෙන්න එපා, ඔවුන් ඔබේ අමුත්තන්. ඔවුන් ලෝක කුසලානය ක්‍රීඩා කිරීමට පැමිණ සිටින අමුත්තන් බවත් මෙහි සිටින අපි මතක තබා ගත යුතුයි.”
