ඇල්ල – වැල්ලවාය මාර්ගයේ 24 කණුව ප්රදේශයේ දී පෙරේදා (04) අනතුරට ලක්වූ බස් රථය 2023 වසරේ ජාතික ගමනාගමන කොමිෂන් සභාවේ ලියාපදිංචියෙන් ඉවත් වූ බස් රථයක් බව ප්රවාහන නියෝජ්ය අමාත්ය ප්රසන්න ගුණසේන පවසනවා.
ඒ, අනුව අදාළ බස් රථය මගී ප්රවාහනය සම්බන්ධයෙන් නිසි නියාමනයකට ලක්ව නොමැති බවයි නියෝජ්ය අමාත්යවරයා සඳහන් කළේ.
කෙසේ වෙතත් විනෝද චාරිකා සඳහා පමණක් භාවිත කෙරෙන බස් රථ නියාමනය කිරීම සඳහා නීති සම්පාදනය කර නොමැති බව ඔහු වැඩිදුරටත් පවසනවා.
මේ අතර ඇල්ල – වැල්ලවාය මාර්ගයේ අනතුරු අවමකර ගැනීම සඳහා ගත යුතු සියලුම පියවරටන් මාර්ග සංවර්ධන අධිකාරිය විසින් ගෙන ඇති බවත් නියෝජ්ය අමාත්ය ප්රසන්න ගුණසේන සඳහන් කර සිටියා.
ජීවිත 15ක් බිළිගනිමින් අඩි 500ක් පමණ ප්රපාතයකට පෙරළී අනතුරට පත් වූ බස් රථයේ සුන්බුන් අද (06) පෙරවරුවේ ඇල්ල පොලිස් ස්ථානය වෙත ගෙන ඒමට කටයුතු කර තිබුණා.
මේ අතර මෙම අනතුරින් ජීවිතක්ෂයට පත් වූ තංගල්ල නගර සභාවේ සේවකයන්ගේ මෘතදේහ අද (06) උදෑසන තංගල්ල නගර සභා ශාලාව වෙත ගෙන එනු ලැබුවා.
එහිදී පැය 02ක පමණ කාලයක් මහජන ගෞරව දැක්වීමට එම දේහයන් එහි තැන්පත් කර තිබූ අතර, අග්රාමාත්ය ආචාර්ය හරිනි අමරසූරිය ද එහි පැමිණ එම දේහයන්ට අවසන් ගෞරව දක්වා සිටියා.
අද (06) පෙරවරු 10.00ට පමණ ආගමික වතාවත්වලින් අනතුරුව එම දේහයන් ඔවුන්ගේ නිවෙස්වලට රැගෙන යනු ලැබුවා.
