ආසියානු සංවර්ධන බැංකුවේ (ADB) ශ්රී ලංකා නියෝජිත තකෆුමි කඩොනො සහ පර්යේෂණ හා සංවර්ධන වාණිජකරණ ජාතික ප්රවේශයහි නියෝජිතයන් අතර හමුවක් ඊයේ (20) ආසියානු සංවර්ධන බැංකු ශ්රී ලංකා නියෝජිතායතනයේදී පැවැත් වුණා.
පර්යේෂණ සහ සංවර්ධන ක්ෂේත්රය හා සම්බන්ධ ජාත්යන්තර අත්දැකීම්, ජාතික පර්යේෂණ සහ සංවර්ධන ප්රතිපත්ති සැකසීම සඳහා මෙන්ම පර්යේෂණ හා සංවර්ධන වාණිජකරණ ජාතික ප්රවේශය (NIRDC) මගින් ක්රියාත්මක කරන වාණිජකරණ ක්රියාවලිය සඳහා උපයෝගී කර ගැනීම පිළිබදව අදහස් හුවමාරු කර ගැනීම මෙම සාකච්ඡාවේ අරමුණ වී තිබුණා.
මෙම හමුවට පර්යේෂණ සහ සංවර්ධන ක්ෂේත්රය සම්බන්ධයෙන් ජාත්යන්තර අත්දැකීම් බහුල සිංගප්පූරුවේ නන්-යැන්ග් තාක්ෂණ විශ්වවිද්යාලයේ මහාචාර්ය ලර්වෙන් ලු සහ IITM ප්රවර්තක් තාක්ෂණ පදනමෙහි නව ප්රවේශයන්හි ප්රධානියා වන රාජේන්ද්ර මෝතා යන අයද සහභාගී වුණා.
පර්යේෂණ හා සංවර්ධන වාණිජකරණ ජාතික ප්රවේශය (NIRDC)නියෝජනය කරමින් විද්යාව හා තාක්ෂණය පිළිබඳ ජනාධිපති ජ්යෙෂ්ඨ උපදේශක මෙන්ම NIRDC නිර්මාතෘ මහාචාර්ය ගෝමික උඩුගමසූරිය , NIRDC අධ්යක්ෂ ජනරාල් ආචාර්ය මුදිත ඩී. සෙනරත් යාපා, අධ්යක්ෂ (ආයෝජන) ඉඳුනිල් ගුණතිලක ඇතුළු පිරිසක් ඊට එක්ව සිටියා.
