සමුද්‍රීය පර්යේෂණ කාර්යයක නිරත වෙමින් සිටියදී, දෝෂයක් හේතුවෙන් දකුණු මුහුදේදී ආපදාවට පත්වූ නවසීලන්තයට අයත් ‘Little Donkey’ නැමැති පැදි යාත්‍රාව එහි සිටි විදේශීය ජාතිකයින් දෙදෙනෙකු සමඟ අළුත්වැඩියාව සඳහා නිරුපද්‍රිතව හම්බන්තොට වරාය වෙත රැගෙන විත් තිබෙනවා.
ඒ ශ්‍රී ලංකා නාවික හමුදා මූලස්ථානයේ ස්ථාපිත කොළඹ, සමුද්‍රීය සෙවීම් සහ මුදවාගැනීම් සම්බන්ධීකරණ මධ්‍යස්ථානයේ (MRCC – Colombo) සම්බන්ධීකරණයෙන්.
පර්යේෂණ කාර්යයක් සඳහා බෙංගාල බොක්ක මුහුදු තීරය තුළින් ක්ෂුද්‍ර ජීවි සාම්පල ලබා ගැනීම සඳහා තායිලන්තයේ සිට පැමිණි (To collect high quality microbiological samples for DNA analysis to support Ocean Health Baseline global assessment) පැදි යාත්‍රාවක, පැදි පද්ධතියේ (Pedal based rowing system) ඇති වූ දෝෂයක් හේතුවෙන් පුද්ගලයන් දෙදෙනෙකු රැගත් එම යාත්‍රාව, මෙරට සමුද්‍රීය සෙවීම් සහ මුදවාගැනීම් කළාපය තුලදී ආපදාවට පත් වී තිබුණා.
එම යාත්‍රාව යථා තත්වයට පත් කිරීම සඳහා ගොඩබිම වෙත ඇදගෙන ඒමට නාවික හමුදාවේ සහය ලබා දෙන ලෙසට, එහි දේශීය නි‍යෝජිතයින් මඟින් මෙරට, සමුද්‍රීය සෙවීම් සහ මුදවාගැනීම් සම්බන්ධීකරණ මධ්‍යස්ථානය වෙත ඊයේ ඉල්ලීමක් කර තිබෙනවා.
එම ඉල්ලීමට, නාවික හමුදාපතිවරයාගේ උපදෙස් මත ක්‍රියාත්මක වූ නාවික හමුදාව, පී 483 වේග ප්‍රහාරක යාත්‍රාව ආපදාවට පත් යාත්‍රාව පිහිටි මුහුදු ප්‍රදේශය වෙත යොමු කරන තිබුණා.
ඒ අනුව, එම වේග ප්‍රහාරක යාත්‍රාව මඟින් ආපදාවට පත් එම පැදි යාත්‍රාව සහ එහි සිටි විදේශීය ජාතිකයින් දෙදෙනා ඊයේ රාත්‍රිය වන විට නිරුපද්‍රිතව හම්බන්තොට වරාය වෙත රැගෙන ඒමට කටයුතු කර ඇති බවයි නාවික හමුදාව සඳහන් කළේ.
මෙලෙස ආපදාවට පත් වූ විදේශිය යාත්‍රා 35ක් වෙත පසුගිය 2022 වසරේදී කොළඹ – සමුද්‍රීය සෙවීම් සහ මුදවාගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන් අවශ්‍ය සහන සැලසීමට කටයුතු කර ඇති බව ද නාවික හමුදාව ප්‍රකාශ කළා.
