අහුංගල්ල ප්‍රදේශයේදී ඊයේ (21) රාත්‍රී එල්ල වූ වෙඩි ප්‍රහාරයෙන් තුවාල ලැබූ කුඩා බිළිඳා සහ එම බිළිඳාගේ පියා වැඩිදුර ප්‍රතිකාර සඳහා කරාපිටිය ශික්ෂණ රෝහලට මාරු කර යවා තිබෙනවා.
අප වාර්තාකරුවන් සඳහන් කළේ වෙඩි ප්‍රහාරයෙන් මාස 4ක් වයසැති බිළිඳාගේ පාදයකට මෙන්ම පියාගේ මුඛය ප්‍රදේශයට වෙඩි ප්‍රහාරයෙන් තුවාල සිදු වී ඇති බවයි.
අඹුසැමි යුවළක් තම බිළිඳා සමග යතුරුපැදියකින් ගමන් කරමින් සිටියදී ඊයේ රාත්‍රියේ වෙඩි ප්‍රහාරයට ලක්ව තිබුණේ අහුංගල්ල ගල්වෙහෙර ප්‍රදේශයේදීයි.
තුවාල ලැබූ කාන්තාව තවදුරටත් බලපිටිය රෝහලේ ප්‍රතිකාර ලබමින් සිටිනවා.
තුවාල ලබා ඇත්තේ අවුරුදු 32 සහ 27 වයස්වල පසු වූ අඹුසැමි යුවළක් සහ මාස 4ක් වයසැති ඔවුන්ගේ කුඩා බිළිඳායි.
ඔවුන් ගල්වෙහෙර ප්‍රදේශයේම පදිංචිකරුවන් බවයි පොලිසිය කියාසිටියේ.
මෙම යුවළ තම ව්‍යාපාරික ස්ථානයේ සිට නිවස බලා ගමන් කරමින් සිටියද’ී ගල් වෙහෙර ප්‍රදේශයේ කුරුඳු ඉඩමක සැඟව සිටි පුද්ගලයෙකු විසින් වෙඩි තැබීම සිදුකර ඇති බවට විමර්ශනයේදී අනාවරණ වී තිබෙනවා.
වෙඩි තැබීමට ටී 56 වර්ගයේ අවියන් භාවිත කර ඇති බවටයි සඳහන් වන්නේ.
තුවාලකරුවන් බලපිටිය රෝහලට ඇතුලත් කිරීමෙන් පසු පිරිමි පුද්ගලයා සහ බිළිඳා වැඩිදුර ප්‍රතිකාර සඳහා කරාපිටිය ශික්ෂණ රෝහලට මාරු කර යවා තිබෙනවා.
සැකකරුවන් අත්අඩංගුවට ගැනීම සඳහා අහුංගල්ල පොලිසියයි විමර්ශන සිදු කරනු ලබන්නේ.
