පසුගිය 14 වනදා අහුංගල්ල, මිද්දරමුල්ල ප්‍රදේශයේ දී වෙඩි තබා පුද්ගලයෙකු ඝාතනය කිරීමට වෙඩික්කරුවන් පැමිණි යතුරුපැදිය පොලිසිය විසින් සොයාගෙන තිබෙනවා.
කරන්දෙණිය, ඇරවාවිල – පනාපිටිය මාර්ගයේ දීනවල ප්‍රදේශයේ කුරුඳු ඉඩමක දමාගොස් තිබිය දී එම යතුරුපැදිය අද සොයාගත් බවයි පොලිසිය සඳහන් කළේ.
මෙලෙස සොයාගත් යතුරුපැදියේ සවිකර තිබූ අංක තහඩුව අහුංගල්ල ප්‍රදේශයේ පදිංචි අයෙකුට අයත් යතුරුපැදියක අංකයට සමානව ව්‍යාජ ලෙස සැකසූ එකක් බවට පොලිසිය අනාවරණය කරගෙන තිබෙනවා.
වෙඩි තැබීමට සම්බන්ධ සැකකරුවන් දෙදෙනෙකු සහ සැකකාරියන් දෙදෙනෙකු මේ වනවිට අත්අඩංගුවට ගෙන ඇති බවයි වාර්තා වන්නේ.
පසුගිය 14 වනදා පස්වරුවේ යතුරුපැදියකින් ගමන් කරමින් සිටි අයෙකුට තවත් යතුරුපැදියකින් පැමිණි දෙදෙනෙකු විසින් වෙඩිතබා පලාගොස් තිබුණේ අහුංගල්ල, මිද්දරමුල්ල ප්‍රදේශයේ දීයි.
එහිදී වෙඩි ප්‍රහාරයට ලක්වූ යතුරුපැදිකරු ජීවිතක්ෂයට පත් වූ අතර, එහි ගමන් කරමින් සිටි දරුවන් දෙදෙනකු ද තුවාල ලබා රෝහල්ගත කෙරුණා.
මෙලෙස වෙඩි ප්‍රහාරයට ලක්ව ඝාතනය වුණේ 29 හැවිරිදි අහුංගල්ල ප්‍රදේශයේ පදිංචිකරුවෙක්.
