ශ්‍රී ලංකා කණ්ඩායම සහ සත්කාරක බටහිර ඉන්දීය කොදෙව් කණ්ඩායම සමඟ තුන්වන සහ අවසන් එක්දින තරගයත්
එකඳු පන්දුවක් හෝ නොයවා සම්පූර්ණයෙන්ම අතහැර දැමීමට අද (09) සිදු වුණා.
ඒ, මෙම තරගයටත් වර්ෂාවෙන් බාධා එල්ලවීම හේතුවෙන්.
මේ සමඟ තරග තුනකින් සමන්විත එක්දින තරගාවලිය තරග එකට බිංදුවක් ලෙස ශ්‍රී ලංකා කණ්ඩායමට ජයග්‍රහණය හිමි වුණා.
අද පැවැත්වීමට තිබූ තුන්වන සහ අවසන් එක්දින තරගය වෙනුවෙන් වෙන්කර තිබූ සබිනා පාර්ක් ක්‍රිකට් ක්‍රීඩාංගණයට ඇද හැලුණු අධික වර්ෂාව හේතුවෙන් තරගය ආරම්භ කිරීමට හැකියාව ලැබුනේ නැහැ.
අවස්ථා කිහිපයක දී විනිසුරුවන් පිටිය පරීක්ෂා කළත් වර්ෂාවත් සමඟ එය තරගය පැවැත්වීම නොහැකි මට්ටමේ පැවතීම හේතුවෙන් තරගය අතහැර දැමීමටයි විනිසුරුවන් කටයුතු කළේ.
දෙරට තරග පැවැත්වීමට තිබූ දෙවන එක්දින තරගය ද වර්ෂාවෙන් සේදී ගිය අතර, පළමු එක්දින තරග ලකුණු 41 කින් ජයගැනීමට ශ්‍රී ලංකා කණ්ඩායම සමත් වුණා.
ඒ, අනුව තරගාවලියේ ජය ශ්‍රී ලංකාවට හිමි වූ අතර මෙම ජයග්‍රහණය 2003 වසරෙන් පසුව ශ්‍රී ලංකා කණ්ඩායමක් කැරිබියන් දූපත්හි දී ලබාගත් පළමු එක්දින තරගාවලි ජයග්‍රහණයවීම විශේෂත්වයක්.
