දසවැනි පාර්ලිමේන්තුවේ, පළමුවැනි සභා වාරයේ පළමු රැස්වීම පැවැත්වීමට අදාළව සියලුම පාර්ලිමේන්තු මන්ත්‍රීවරුන්ගේ තොරතුරු ලබාගැනීම සඳහා පාර්ලිමේන්තු වෙබ් අඩවිය හරහා අදාළ තොරතුරු ඇතුළත් කිරීමේ පහසුකම් සළසා ඇති බව පාර්ලිමේන්තුවේ මහලේකම් කුෂානි රෝහණදීර නිවේදනයක් නිකුත් කරමින් සඳහන් කරනවා.
ඒ, අනුව පාර්ලිමේන්තු වෙබ් අඩවියේ (www.parliament.lk) මුල් පිටුවේ ඇති තොරතුරු සබැඳියට පිවිස අදාළ තොරතුරු සම්පූර්ණ කරන ලෙසයි එම මන්ත්‍රීවරුන්ගෙන් ඉල්ලා සිටින්නේ.
එමෙන්ම තොරතුරු ලබාදීමේ විකල්පයක් ලෙස මෙම සබැඳියෙන් බාගත කර ගත හැකි ආකෘති පත්‍රය පුරවා භාරදීම ද සිදුකළ හැකි බවත් මහ ලේකම්වරියගේ නිවේදනයේ වැඩිදුරටත් සඳහන්.
මීට අමතරව දසවැනි පාර්ලිමේන්තුවේ, පළමුවැනි සභා වාරයේ පළමුවැනි රැස්වීම පැවැත්වීම සඳහා අවශ්‍ය කටයුතු පහසු කරවනු පිණිස පාර්ලිමේන්තු මන්ත්‍රීවරුන් සඳහා තොරතුරු කවුළුවක් 2024 නොවැම්බර් 19 වැනි අඟහරුවාදා සහ 20 වැනි බදාදා පෙරවරු 9.30 සිට පස්වරු 3.30 දක්වා කාලය තුළ පාර්ලිමේන්තු සංකීර්ණයේ දී ක්‍රියාත්මක වනවා.
එහිදී සියලුම මන්ත්‍රීවරයන්ට ප්‍රයෝජනවත් වන තොරතුරු සහ ලිපිලේඛන සැපයීම, පාර්ලිමේන්තු මන්ත්‍රීවරයන්ගේ හැඳුනුම්පත සඳහා ඡායාරූප ලබාගැනීම සහ විද්‍යුත් ඡන්ද විමසීමේ කටයුතුවලට අදාළව ඇඟිලි සළකුණු ලබාගැනීම සඳහා කටයුතු සූදානම් කර ඇති බැවින්, එයට පැමිණ සහභාගීවන ලෙස ද මහලේකම්වරිය මන්ත්‍රීවරුන්ගෙන් ඉල්ලීමක් කරනවා.
