චීන මහජන දේශපාලන උපදේශන සම්මේලනයේ ජාතික කමිටුවේ උප සභාපතිනි, ක්වින් බොයෝන්ග් මහත්මිය පසුගිය දා (18) කතානායක ජගත් වික්‍රමරත්න මහතා හමු වී තිබෙනවා.
පාර්ලිමේන්තුවේ දී මෙම හමුව සිදු වූ බවයි පාර්ලිමේන්තු මහා ලේකම් කාර්යාලය නිවේදනය කළේ.
ශ්‍රී ලංකාව සහ චීනය අතර දීර්ඝ කාලීන මිත්‍රත්වය අගයමින් කතානායකවරයා, ක්වින් බොයෝන්ග් ඇතුළු දූත පිරිස සඳහා දිවා භෝජන සංග්‍රහයක් මෙහිදී පවත්වා තිබෙනවා.
පාර්ලිමේන්තු සහයෝගීතාව, තිරසාර සංවර්ධනය, වෙළෙඳාම, කෘෂිකර්මය, කර්මාන්ත සහ අනෙකුත් බහුපාර්ශ්වික කටයුතුවලදී ද්විපාර්ශ්වික සබඳතා තවදුරටත් ශක්තිමත් කිරීමේ වැදගත්කම කතානායකවරයා මෙහි දී අවධාරණය කරනු ලැබුවා.
2025 වසර සඳහා ශ්‍රී ලංකාවේ පාසල් සිසුන්ට පාසල් නිල ඇඳුම් ලබාදීම සඳහා චීන රජය කටයුතු කිරීම පිළිබඳව කථානායකවරයා මෙහිදී සිය කෘතඥතාව පළ කළා.
විශේෂයෙන් ශ්‍රී ලංකාව මෑත කාලීනව මුහුණ දුන් ආර්ථික අභියෝගයේ දී චීනය ලබාදුන් සුවිශේෂී සහාය කතානායකවරයාගේ ඇගයීමටවුණා.
ක්වින් බොයෝන්ග් උප සභාපතිනිය, කතානායක ධුරයට අභිනවයෙන් පත්වූ ජගත් වික්‍රමරත්නට සිය සුබපැතුම් එක් කර සිටියා.
ශ්‍රී ලංකාවේ නව රජයේ ආර්ථික සහ සමාජ සංවර්ධන අරමුණු සාක්ෂාත් කර ගැනීම සඳහා සහාය දැක්වීමට චීනය සූදානම් බව ඇය මෙහිදී අවධාරණය කළා.
